Венесуэлада не болып жатыр?

АҚШ Президенті Дональд Трамп Венесуэла мен оның басшылығына қарсы «ауқымды операция» жүргізілгенін хабарлады. Бұл туралы ол өзінің Truth Social әлеуметтік желісіндегі парақшасында жазды. Трамптың айтуынша, операция АҚШ-тың құқық қорғау органдарымен бірлесіп жүзеге асырылған. Ол Венесуэла президенті Николас Мадуро мен оның жұбайының қолға түскенін және елден шығарылғанын алға тартты. Қазіргі сәтте АҚШ ресми билігі тарапынан бұл ақпаратқа қатысты әлі де ресми растау түскен жоқ.

Сондай-ақ, Трамп Майами уақытымен сағат 11:00-де өзінің Мар-а-Лаго резиденциясында баспасөз мәслихатын өткізетінін хабарлады.

Сенбіге қараған түні, 3 қаңтарда Венесуэланың бірнеше ауданында жойқын жарылыстар тіркеліп, елдегі жағдай күрт шиеленісті. Әзірге бұл жарылыстардың ресми себебі жарияланған жоқ, алайда осы оқиғалар аясында президент Николас Мадуроның нақты қайда екені белгісіз болып отыр. Бұған дейін Мадуро АҚШ тарапынан «әскери агрессия» басталғанын мәлімдеп, бүкіл ел бойынша кешенді қорғаныс күштерін өрістету туралы жарлыққа қол қойған болатын. Қазіргі уақытта Венесуэла армиясы мемлекеттік институттар мен ел егемендігін қарулы қорғаудың төтенше режиміне көшірілді.

АҚШ пен Венесуэла арасындағы текетірес өткен жылдың тамыз айында, Кариб теңізінде Американың әскери күштері көбейген кезден бастап ушыға түскен еді. Дональд Трамп бұған дейін де есірткі трафигімен күрес сылтауымен Венесуэла аумағындағы нысандарға соққы жасалуы мүмкін екенін ашық айтқан болатын. Қазіргі сәтте аймақтағы жағдай өте күрделі болып қалуда және ақпараттар нақтылану үстінде.