Венесуэла дағдарысы: Трамптың қатаң талабы мен Еуроодақтың мәлімдемесі

Венесуэлада соңғы күндері әлем назарын аударған үлкен саяси оқиғалар болып жатыр. Елді ұзақ жылдар басқарған Николас Мадуро биліктен тайдырылып, АҚШ-тың арнайы операциясының нәтижесінде тұтқындалды. Мадуро мен оның жұбайы Силия Флорес бірден Нью-Йорктегі Бруклин түрмесіне жеткізілді. АҚШ билігі оларға «есірткі терроризмі, кокаин тасымалы және заңсыз қару сақтау» бойынша ауыр айыптар тағып отыр. Олар 5 қаңтарда федералды сот алдында жауап беруі тиіс, деп хабарлайды VTV.

Мадуро кеткеннен кейін елдегі билікті Жоғарғы соттың шешімімен президент міндетін атқарушы болып тағайындалған Делси Родригес өз қолына алды. Ол министрлер кабинетінің алғашқы жиналысын өткізіп, елдегі тыныштықты сақтауға шақырды. 

Родригес: «Бізге соғыс емес, бейбітшілік керек», — деп мәлімдеме жасап, АҚШ-пен жақсы қарым-қатынас орнатқысы келетінін айтты.

Алайда АҚШ президенті Дональд Трамп бұл операциямен тоқтап қалмауы мүмкін екенін айтты. 

 «Егер жаңа билік бізбен жұмыс істемесе, тағы да әскери соққы береміз», — деп ескертті. Сондай-ақ ол Колумбия мен Мексика сияқты көрші елдерге де "есірткіні тоқтатпасаңдар, сендерге де шара қолданамыз" деп сес көрсетті. 

Бұл оқиға тек саяси текетіреспен шектелмей, қайғылы жағдайларға да алып келді. Мадуроны қолға түсіру кезіндегі қақтығыстарда Куба қауіпсіздік қызметінің 32 қызметкері қаза тапты. Осыған байланысты Кубада екі күндік ұлттық аза тұту жарияланды.

Еуропа Одағы да бұл жағдайға байланысты өз пікірін білдірді. Еуропалық дипломат Кая Каллас Мадуроның заңды президент емес екенін айта отырып, елдегі билік ауысу процесі тек бейбіт жолмен және халықаралық заңдарды сақтай отырып жүруі тиіс екенін атап өтті. Қазіргі уақытта Венесуэла мен бүкіл Латын Америкасы аймағы үлкен өзгерістер алдында тұр.