Үндістанның “ең таза қаласында” кемінде он адам лас су ішіп қайтыс болды

Үндістанның соңғы сегіз жыл қатарынан «ең таза қаласы» атанған Индор қаласында ауызсуға кәріз суларының араласуы салдарынан кемінде 10 адам көз жұмды. Қаза тапқандардың арасында бес айлық сәби де бар. Тағы 270-тен астам тұрғын ауруханаға жеткізілген. Бұл жөнінде The Guardian хабарлады.

Қаланың тығыз орналасқан, әлеуметтік жағдайы төмен аудандарының бірінде тұратын тұрғындар бірнеше ай бойы краннан жағымсыз иіс шығатынын айтып, билікке шағымданған. Алайда бұл ескертулер елеусіз қалған. Соған қарамастан, Индор қоқысты бөлек жинау мен тазалық көрсеткіштері бойынша елде үздік қала ретінде бағаланып келген.

Қала мэрі Пушьямитра Бхаргава Бхагиратхпура ауданында ластанған судан туындаған іш өту індеті салдарынан 10 адамның қайтыс болғанын растады. Оның айтуынша, кәріз сулары су қоймасынан келетін негізгі құбырға араласқан. Жергілікті БАҚ қаза тапқандар саны 15-ке жеткенін жазғанымен, бұл ақпарат ресми түрде расталмады. Қазіргі уақытта 32 науқас жансақтау бөлімінде жатыр.

Мадхья-Прадеш штатының бас министрі Мохан Ядавтың мәлімдеуінше, медицина қызметкерлері үй-үйді аралау барысында 2 456 «күдікті науқасты» анықтаған. Оларға алғашқы медициналық көмек сол жерде көрсетілген.

Билік өкілдерінің алдын ала мәліметінше, ауызсу құбырының үстіне септиксіз салынған қоғамдық дәретхана кәріз суларының су жүйесіне сіңуіне себеп болған. Ауруханаларға түскен тұрғындар құсу, іш өту және жоғары температура белгілеріне шағынған.

Су сынамалары адам қалдықтары бар кәріз суында кездесетін патогенді бактериялардың барын растаған. Тұрғындардың айтуынша, олардың шағымдары ұзақ бюрократиялық рәсімдерге тіреліп, нақты шешім қабылданбаған.

Муниципалдық кеңес мүшесі Камал Вагхеланың пікірінше, бұл жағдай қызметтік міндеттерді өрескел орындамаудың айқын көрінісі. Тергеу басталғаннан кейін бірнеше қалалық шенеунік қызметінен уақытша шеттетілді.

Қайтыс болған бес айлық сәбидің әкесі Сунил Саху баласын бөтелкемен кран суын пайдаланып тамақтандырғанын айтты. Оның сөзінше, судың ластанғаны туралы ешқандай ескерту болмаған, ал сүзгіден өткізілген су бүкіл ауданда бірдей пайдаланылған.

Оқиғаға байланысты үнді басылымдары су қауіпсіздігі мен экологиялық заңдарды қатаң орындау қажеттігін атап өтті. Оппозиция өкілі Рахул Ганди штат билігін салғырттыққа айыптап, «таза су – биліктің сыйы емес, өмір сүру құқығы» екенін мәлімдеді.

Үкімет мұндай жағдайдың қайталанбауы үшін жаңа ережелер әзірленетінін хабарлады. Индордағы жағдай ел бойынша ауызсу қауіпсіздігіне қатысты алаңдаушылықты күшейтті. Сарапшылар урбанизация үдерісі күшейген сайын су сапасын бақылаудағы олқылықтар індеттердің таралу қаупін арттыратынын ескертеді.