Үндістан балалардың әлеуметтік желі қолдануына тыйым салуды жоспарлап отыр

Үндістанда 16 жасқа толмаған балалардың әлеуметтік желілерді пайдалануын шектеу туралы бастама қызу талқыға түсіп жатқан мәселеге айналды. Бірнеше штаттың министрлері мен федералды үкімет өкілдері Австралия мен Франция тәжірибесіне сүйене отырып, тиісті заңнамалық базаны зерттеуге кірісті, деп хабарлайды BBC.

Австралия әлемде бірінші болып 16 жасқа толмағандарға әлеуметтік желілерді қолдануға ресми түрде тыйым салған болатын. Енді бұл толқын Үндістанға да жетті. Жақында Үндістанның бас экономикалық кеңесшісі әзірлеген Экономикалық шолу құжатында федералды үкіметке балалар үшін жас ерекшелігіне қарай шектеулер енгізуді қарастыру ұсынылды.

Андхра-Прадеш және Гоа штаттарының министрлері бұл тыйымның тиімділігін зерттейтін арнайы топтар құрылғанын хабарлады. Андхра-Прадеш штатының Ақпараттық технологиялар министрі Нара Локеш әлеуметтік желілердің балалардың зейініне, біліміне және қауіпсіздігіне тигізер зардабы орасан екенін атап өтті.
Заңнамалық және техникалық кедергілер
Алайда сарапшылар Үндістан сияқты алып елде мұндай тыйымды іске асырудың бірқатар қиындықтары бар екенін ескертеді:

• Жасты тексеру мәселесі: Әлеуметтік желі платформалары әрбір қолданушының нақты жасын анықтау үшін барлық пайдаланушыны тексеруден өткізуі тиіс, бұл техникалық тұрғыдан өте күрделі процесс.
• Географиялық шектеулер: Штат деңгейінде тыйым салу қиындық тудырады. Бір штатта тыйым салынып, көрші штатта рұқсат етілсе, IP-мекенжайлар арқылы шекараны дәл анықтау мүмкін емес.

Тіпті Австралияның өзінде балалар жалған туған күндерін көрсету арқылы шектеулерді айналып өтуді үйреніп алған.

Сарапшылар мен ата-аналардың бір бөлігі мәселе тек тыйым салуда емес екенін айтады. Үндістандағы зерттеулер көрсеткендей, көптеген балалардың аккаунттарын ата-аналарының өздері ашып береді.
Дели тұрғыны Житендер Ядав:

«Ата-аналардың балаларына уақыт бөлмеуі - басты мәселе. Баламен айналысудың орнына, қолына телефон ұстата салу оңай. Егер ата-ана баласымен сапалы уақыт өткізбесе, кез келген тыйымды айналып өтудің жолын бала бәрібір табады», - деп есептейді.

Қазіргі уақытта Карнатака штаты Meta компаниясымен бірлесіп, 300 мың студент пен 100 мың мұғалімге арналған «цифрлық детокс» бағдарламасын бастады. Бұл тыйым салудан гөрі, әлеуметтік желіні жауапты қолдануға үйретудің балама жолы ретінде қарастырылуда.