Үндістан АҚШ-тың баж салығын төмендету үшін ресейлік мұнайдан бас тартады

АҚШ президенті Дональд Трамп Үндістанмен сауда келісіміне қол жеткізілгенін мәлімдеді. Reuters агенттігінің хабарлауынша, келісім аясында АҚШ Үндістаннан келетін тауарларға салынатын кедендік баж салығын 50 пайыздан 18 пайызға дейін төмендетеді. Есесіне Үндістан ресейлік мұнайды сатып алуды тоқтатып, сауда кедергілерін азайтуға міндеттенеді.

Трамп бұл туралы Үндістан премьер-министрі Нарендра Модимен телефон арқылы сөйлескеннен кейін әлеуметтік желіде жазды. Оның айтуынша, енді Үндістан мұнайды АҚШ-тан немесе Венесуэладан сатып алады. Сонымен қатар Нью-Дели АҚШ-тан энергия тасымалдаушыларын, соның ішінде көмірді, сондай-ақ технология, ауыл шаруашылығы және өзге де өнімдерді 500 млрд доллардан астам сомаға сатып алуға келіскен.

Трамптың сөзінше, Үндістан АҚШ-қа қатысты тарифтік және тарифтік емес шектеулерді нөлге дейін төмендету бағытында да қадам жасайды. Ал Моди әлеуметтік желіде америкалық әріптесіне алғыс білдіріп, бұл шешімді «Үндістан халқы үшін маңызды қадам» деп атады.

Ақ үй өкілі Reuters агенттігіне АҚШ-тың ресейлік мұнай сатып алуға байланысты Үндістанға салынған қосымша 25 пайыздық баж салығын алып тастайтынын растады. Бұған дейін бұл тарифтер «жауапты шара» ретінде енгізілген болатын. Өткен жылдың тамызында Трамп Үндістанға қысым жасау үшін импорттық бажды 50 пайызға дейін көтерген еді.

Келісімнің нақты қашан күшіне енетіні, Үндістан қандай америкалық тауарларды сатып алатыны және ресейлік мұнайдан толық қашан бас тартатыны әзірге нақтыланбады. Дегенмен соңғы айларда Үндістан Ресейден мұнай импортын біртіндеп қысқартып келеді: қаңтарда тәулігіне шамамен 1,2 млн баррель болса, ақпанда 1 млн баррельге, ал наурызда 800 мың баррельге дейін төмендеуі мүмкін.