Украиндардың төрттен үші соғысты қазіргі күйінде тоқтата тұруға дайын – сауалнама

Украина халқының басым бөлігі соғысты қазіргі күйінде тоқтата тұруға дайын, бірақ биыл бітім орнайды деп сенетіндер аз. Киев халықаралық социология институты жүргізген сауалнама нәтижесі осыны көрсетті.

Зерттеу қорытындысына сәйкес, украиндардың 74%-ы Еуропа мен Украинаның бірлескен бейбіт жоспарын қолдауға әзір. Бұл жоспарға қазіргі шеп бойынша соғысты тоқтату, бірақ Ресей басып алған жерлерді заңды түрде мойындамау және Украинаға қауіпсіздік кепілдігін беру кіреді.

Сонымен бірге халықтың 56%-ы Ресей бәрібір тағы да шабуыл жасауға тырысады деп есептейді.

Сауалнамаға қатысқандардың 76%-ы АҚШ көмектен бас тартқан жағдайда да Еуропаның қолдауымен қарсыласуды жалғастыру қажет деген пікірде. Дәл осынша респондент Украина жеткілікті қару-жарақ пен қаржылай қолдау алса, ал одақтастар Ресейге тиімді санкциялар енгізсе, жеңіске жетуге болар еді деп санайды.

Алайда респонденттердің тек 18%-ы ғана бейбітшілік осы жылы орнайды деп сенеді.

Халықтың 62%-ы соғысты қанша уақыт қажет болса, сонша уақытқа дейін көтеруге дайын екенін айтты. Ал қазір әскери қызметте жоқ украиндардың 54%-ы қолына қару ұстап, елін қорғауға баруға әзір екенін білдірген. Бұл көрсеткіш ер адамдар арасында 63% болды.