Украинаға соғыстан кейінгі қалпына келтіру үшін 588 млрд доллар қажет болады

Украинадағы толыққанды соғыстың салдарын жою үшін келесі 10 жыл ішінде 587,7 млрд доллар (шамамен 500 млрд евро) қажет болады. Бұл мәліметті 2025 жылғы 31 желтоқсандағы деректер негізінде Украина үкіметі, Дүниежүзілік банк, Еурокомиссия және БҰҰ бірлесіп ұсынды.

Премьер-министр Юлия Свириденконың айтуынша, бұл сома Украина 2025 жылы күтілетін номиналды ЖІӨ-нің үш есе мөлшерінен асып отыр. Ең көп қаражат – 96 млрд доллар – транспорт секторын қалпына келтіруге жұмсалуы керек. Одан кейінгі орында – тұрғын үй саласы (90 млрд), сауда және өнеркәсіп салалары (63 млрд), ауыл шаруашылығы (55 млрд). Сондай-ақ жарылыстар салдарын жою және жерді минадан тазалау үшін 28 млрд доллар қажет.

Толыққанды соғыстан тікелей шығын 195 млрд доллардан асты, бұл өткен жылғы бағалаудан 19 млрд долларға көп. Ең қатты зардап шеккен аймақтар – майданға жақын өңірлер мен ірі қалалар.

Өткен жылғы есепте 10 жыл ішінде қалпына келтіру үшін 524 млрд доллар қажет деп көрсетілген еді. Шамалардың өсуі энергетика объектілерінің 21%-ға, транспорт саласындағы қажеттіліктердің 24%-ға өсуімен байланысты. 2025 жылғы дерекке сәйкес, Украинада тұрғын үйлердің 14%-ы зақымданған немесе бұзылған, бұл үш миллионнан астам отбасыны қамтиды.

Ал 2025 жылғы шілдеде сол кездегі премьер-министр Денис Шмыгаль елге соғыстан кейінгі қалпына келтіру үшін 1 трлн доллар қажет екенін мәлімдеген. Ол қаржыны екі қор арқылы тартуды ұсынған: бірі – «Украина қоры» (Киев басқарады), Ресей активтерінен және экспорт салықтарынан қаржыландырылады, екіншісі – жеке инвестициялардан құрылатын қор.