Түркияның барлық аймағында бомбапана соғу басталды. Не үшін?

Түркия 81 провинциясында бомба мен төтенше жағдай кезінде қорғануға арналған паналар салу жұмысын бастады. Бұл туралы Middle East Eye Түркия билігінің жоспарымен таныс дереккөздеріне сілтеме жасап хабарлады.

Ақпарат көздерінің айтуынша, жобаға Президент Режеп Тайып Ердоған маусым айында өткен үкімет отырысында қол қойған. Сол кезде Иран мен Израиль арасындағы қақтығыс шиеленісіп, Израиль Иранға әуе шабуылдарын жасап, Тегеран баллистикалық зымырандармен жауап берген еді.

Құрылысты жүзеге асыру міндеті Түркияның Тұрғын үйді дамыту басқармасы – TOKI-ге жүктелді. Бұған дейін Түркия Ұлттық барлау академиясы Израиль мен Иран арасындағы 12 күндік соғысқа талдау жасап, үкіметке ерте ескерту жүйелерін енгізуді және жақсы жабдықталған паналар салуды ұсынған. Есепте ірі қалалардағы метро станцияларын да пайдалануға болатыны айтылған.

Түрік шенеуніктері әсіресе Израильдің кең көлемдегі бомбапана жүйесіне назар аударған. Бұл жүйе шабуыл кезінде бейбіт тұрғындардың қауіпсіз жерге жасырынуына мүмкіндік берді.

NTV телеарнасының хабарлауынша, бастаманың мақсаты – ықтимал соғыс немесе апат жағдайында, соның ішінде ядролық қатер туындаған кезде де, азаматтарды қорғауға арналған қауіпсіз аймақтар құру. Қазір Түркияда мұндай инфрақұрылым жеткіліксіз, ал бар нысандардың көбі негізгі талаптарға сай келмейді.

Сонымен қатар Түркияның Қалалық даму министрлігі Жапония мен Швейцария тәжірибесін зерттеген. Құрылыс жұмыстары Анкара сияқты ірі қалаларда басталып та кетті.

Айта кетейік, Түркияда 1987 жылы қабылданған Shelter Regulation ережесі белгілі бір көлемнен асатын ғимараттарда арнайы бомбапаналар салуды міндеттейді. Алайда іс жүзінде бұл талап жиі орындалмай, көптеген бомбапана автотұрақ немесе қойма ретінде қолданылып келген.