Түркияда жойқын зілзала болды

27 қазан күні Түркияның батысындағы Балыкесир өңіріне қарасты Сындыргы ауданында магнитудасы 6,1 балл болатын жер сілкінісі тіркелді. Бұл туралы елдің Төтенше жағдайларды басқару агенттігі (AFAD) хабарлады.

Сейсмикалық дүмпу жергілікті уақыт бойынша 22:48-де болған. Эпицентр 6 шақырым тереңдікте орналасқан. Жер сілкінісі Ыстамбұл, Измир және Бурса қалаларында да қатты сезілді.

Ресми мәліметке сәйкес, қаза тапқандар туралы ақпарат жоқ, алайда 22 адам жарақат алған. Көпшілігі дүрбелең кезінде үйден асығыс шыққан кезде жарақаттанған. Кейбір ғимараттар, соның ішінде ескі үйлер мен пайдаланылмай тұрған құрылыстар құлаған.

Жергілікті билік өкілдері мешіттер мен мектеп ғимараттарын уақытша баспанаға айналдырып, тұрғындарға көмек көрсетіп жатыр.

Түркия билігі елдің бұл бөлігі жоғары сейсмикалық белсенді аймақ екенін еске салды. Бұған дейін дәл осы өңірде биылғы тамыз айында да 6 баллдық жер сілкінісі тіркелген болатын.

Сарапшылардың айтуынша, жер сілкінісі беткі қабатқа өте жақын болғандықтан, дүмпу күші кең аумаққа тараған.