Трамптың «тарифтік соққысы»: Оңтүстік Корея тауарлары 25%-ға қымбаттамақ

Дональд Трамп дүйсенбі күні Оңтүстік Кореядан келетін тауарларға салынатын баж салығын 15%-дан 25%-ға дейін көтеретінін хабарлады. Бұған Сеулдің сауда келісімін толық орындамауы себеп болған, деп хабарлайды CNN.

«Корея заң шығарушы органы біздің тарихи сауда келісімімізді әлі күшіне енгізбегендіктен, мен Оңтүстік Кореяның автомобильдеріне, ағаш өнімдеріне, фармацевтикасына және барлық басқа да өзара баж салықтарын 15%-дан 25%-ға дейін көтеремін», – деп жазды Трамп өзінің Truth Social желісіндегі парақшасында.

Жаңа тарифтердің нақты қашан күшіне енетіні әзірге белгісіз. Ақ үй CNN-нің түсініктеме беру туралы сұрауына әлі жауап қатқан жоқ.

Сеул бұл жағдайға «сабырмен жауап беруді» және АҚШ-қа «тарифтік келісімді орындауға дайын екенін» жеткізуді жоспарлап отыр, – деді сейсенбі күні президенттің баспасөз хатшысы Кан Ю Чжон. Қазіргі уақытта Корея шенеуніктері Трамп әкімшілігімен жеке кездесу үшін шұғыл дайындық үстінде. Елдің сауда министрі АҚШ-қа жоспарланған сапарын ертерек бастап, жақын күндері Сауда өкілі Джеймисон Грирмен кездеспек. Сондай-ақ Индустрия министрі Канададағы сапарын аяқтаған соң, АҚШ-тың Сауда министрі Ховард Латникпен кездесуге барады.

Бұл жаңалық Оңтүстік Кореяның қор нарығына бірден әсер етті. Kospi индексі 1%-дан астамға төмендеп, елдің автомобиль алпауыты - Hyundai акциялары жергілікті уақытпен сағат 09:47-дегі жағдай бойынша 2,2%-ға құлдырады.

АҚШ Сауда министрлігінің мәліметінше, Оңтүстік Корея - Америкаға тауар жеткізуші ірі елдердің бірі. 2024 жылы ол АҚШ-қа 132 миллиард доллардың тауарларын, соның ішінде автомобильдер, автобөлшектер, жартылай өткізгіштер мен электроника экспорттаған. Салықтың өсуі бұл тауарлардың айтарлықтай қымбаттауына әкелуі мүмкін.

Айта кетейік, шілде айында Трамп Оңтүстік Кореямен баж салығын 10%-дан 25%-ға дейін өсіруге жол бермейтін келісімге келген болатын. Алайда Трамптың барлық тауарларға жаппай тариф енгізу мүмкіндігі Жоғарғы сотта қаралып жатқан істің нәтижесіне байланысты шектелуі мүмкін. Сот Трамптың жекелеген елдерге қатысты мұндай ауқымды тарифтерді өз бетінше енгізуге заңды құқығы бар-жоғын анықтайды.

Бұл - Трамптың соңғы кездері жасаған тарифтік қоқан-лоқыларының бірі. Бұған дейін ол Канада тауарларына 100% баж салығын салуды және Гренландияға қатысты жоспарына қарсы шыққан елдерге 10% салық енгізуді ұсынған болатын.