Трамп жақын арада Иранға қарсы соғыс ашуы мүмкін – Axios

Егер Тегеран Вашингтон қойған талаптарға келіспесе, АҚШ президенті Дональд Трамп Израильмен бірлесіп, алдағы апталарда Иранға қарсы әскери қимыл бастауға дайын. Бұл туралы Ақ үйдегі дереккөздерге сүйенген Axios басылымы хабарлады.

Басылым мәліметінше, АҚШ басшысының төзімі таусылып барады. Президент кеңесшілерінің бірі әскери операция ықтималдығын 90 пайызға бағалаған. Оның айтуынша, Ақ үйде Иранмен соғыстан аулақ болуға шақыратындар бар, алайда әскери сценарий басым болып отыр.

Axios дерегінше, ықтимал операция бір реттік әуе соққысымен шектелмейді. Ол Израиль әскері қатысатын ауқымды әскери кампанияға ұласуы мүмкін. Батыс сарапшыларының бағалауынша, алғашқы соққыға АҚШ тарапынан 200–250 ұшақ жұмылдырылуы ықтимал. Егер Израильмен бірлескен операция жүзеге асса, шабуылға қатысатын ұшақтар саны 400-ге дейін жетуі мүмкін. Бұл 2025 жылғы жазда Израиль мен Иран арасындағы 12 күндік соғыста қолданылған әуе техникасынан екі есе көп.

Соңғы апталарда АҚШ Иранға қысымды күшейту мақсатында Таяу Шығысқа, әсіресе Парсы шығанағы аймағына қосымша әскери күштерін жіберген.

Өткен аптада Дональд Трамп Тегеранда режимнің толық ауысуы «Иран үшін ең жақсы нұсқа болуы мүмкін» деген еді. Өз кезегінде Иранның рухани көсемі Әли Хаменеи АҚШ-тың ел билігін құлатуға бағытталған кез келген әрекеті сәтсіздікке ұшырайтынын мәлімдеді.

Аймақтағы жағдайдың шиеленісуі аясында Ресей, Қытай және Иран Ормуз бұғазында «Қауіпсіздік белдеуі» атты бірлескен әскери-теңіз жаттығуын өткізетінін жариялады. Ирандық ақпарат агенттіктерінің хабарлауынша, жаттығу 19 ақпанда басталады. Ресей қорғаныс министрлігі «Стойкий» әскери кемесі Иранның Бендер-Аббас портында жанармай құйғанын растады.

Сонымен қатар Оман мен Швейцария алаңында, Оманның араағайындық етуімен, Вашингтон мен Тегеран арасында Иранның ядролық бағдарламасына қатысты келіссөздер жалғасып жатыр. Соңғы кездесу 17 ақпанда Женевада өткен. Келіссөз қорытындысы бойынша Иран сыртқы істер министрі Аббас Аракчи жұмыс толық аяқталмағанын, бірақ негізгі бағыттар бойынша түсіністік бар екенін айтқан.

Дегенмен Тегеран келісімге тез арада қол жеткізіледі деп сенімді түрде мәлімдеген жоқ. Аймақтағы әскери және дипломатиялық процестердің қатар жүруі алдағы апталардың шешуші болатынын аңғартады.