Трамп: Зеленский соғысты бірден тоқтата алады

АҚШ президенті Дональд Трамп Украина президенті Владимир Зеленский Ресейдің Украинаға қарсы соғысын «практикалық тұрғыда бірден» тоқтата алады деп мәлімдеді. Бұл туралы ол 18 тамыз, дүйсенбі күні таңертең өз әлеуметтік желісі Truth Social-да жазды.

Трамптың сөзінше, соғысты тоқтатудың шарты – Киевтің Қырымнан және НАТО-ға мүшелікке ұмтылудан бас тартуы.

«Естеріңізге түсіріңіздер, бұл қалай басталды. (АҚШ-тың бұрынғы президенті Барак – ред.) Обама Қырымды 12 жыл бұрын бір оқ шығармай-ақ беріп қойды. Сол сияқты Украинаға НАТО-ға жол жоқ. Кейбір дүние ешқашан өзгермейді!!!» – деп жазды Ақ үй басшысы.

Сол күні таңғы сағат 05:40 шамасында Владимир Зеленский Telegram-да мәлімдеме жасап, Вашингтонға жеткенін хабарлады.

«АҚШ президентіне шақырғаны үшін алғыс айтамын. Біз бәріміз соғысты тез әрі сенімді түрде аяқтауды қалаймыз. Бірақ бейбітшілік ұзақ мерзімді болуы тиіс. Бұрынғыдай Украинаға Қырым мен Донбастың бір бөлігін беруге мәжбүрлетіп, кейін Путин оны жаңа шабуыл үшін плацдармға айналдырған сценарий қайталанбауы керек. 1994 жылы Украинаға берілген «қауіпсіздік кепілдіктері» де іске аспады», – деді ол.

Зеленскийдің айтуынша, Қырымды сол кезде бермеу керек болған, дәл сол сияқты 2022 жылдан кейін украин халқы Киевті, Одесса мен Харьковты бермеді.

«Украиндер өз жері үшін, тәуелсіздігі үшін күресіп жатыр. Бұл соғысты бастаған – Ресей. Сондықтан оны аяқтау да Ресейдің міндеті. Біз Америкамен және Еуропадағы достарымызбен бірлесіп, Ресейді шынайы бейбітшілікке мәжбүр етеміз деп сенемін», – деп түйіндеді ол.