Трамп Вашингтонның қаңғыбастарына әскер жіберді

АҚШ президенті Дональд Трамп ел астанасында тәртіп орнату үшін Ұлттық гвардияны жұмылдырды. Бұл қадам үйсіз-күйсіздерді көшеден шығару және қылмыс деңгейін азайту жоспарының бір бөлігі ретінде іске асып жатыр, деп хабарлады BBC-дің орыс қызметі.

Мемлекет басшысы «Вашингтонды бүгін азат етеміз» деп мәлімдеп, қаланы бұрынғыдан да қауіпсіз әрі көрікті етуге уәде берді. Осыған байланысты астана полициясы уақытша федералдық бақылауға өтті.

Reuters дерегінше, қалаға 800 сарбаз жіберіледі. Олардың бір бөлігі тәулік бойы полицияға тікелей көмек көрсетеді. Әскерилердің міндетіне қоғамдық тәртіпті күзету, әкімшілік және логистикалық қолдау кіреді.

Трамп бұған дейін панасыздардың қалада қалуына үзілді-кесілді қарсы екенін айтып, оларды дереу көшіруді талап еткен. Президент баспана ұсынуға уәде берді, бірақ ол тек астанадан тыс жерде болмақ.

Ол 2022 жылы да үйі жоқтарды қаладан шалғай, арзан жер телімдерінде орнатылатын, дәретханасы мен медицинасы бар шатырлы қалашықтарға орналастыру жоспарын жариялаған.

Вашингтондағы қаңғыбастар мәселесімен айналысатын Community Partnership ұйымының мәліметінше, қалада 3 782 қаңғыбас бар, оның 800-ге жуығы көшеде түнеп жүр.

АҚШ-тың өзге қалаларымен салыстырғанда, ел астанасында кісі өлтіру көрсеткіші әлі де жоғары. Биыл 98 кісі өлтіру фактісі тіркелгенімен, өткен жылы қалада соңғы 30 жылдағы ең төменгі деңгейдегі ауыр қылмыс көрсеткіші болған.