Трамп: Путин мен Зеленский кездесу өткізуге дайындалып жатыр

АҚШ президенті Дональд Трамптың мәлімдеуінше, Ресей басшысы Владимир Путин мен Украина президенті Владимир Зеленский соғысты тоқтату мәселесін талқылау үшін екіжақты кездесу өткізуге дайындалып жатыр. Бұл туралы ол 19 тамыз күні The Mark Levin Show радиобағдарламасында айтты.

«Менің Путинмен де, Зеленскиймен де өте сәтті кездесуім өтті. Енді олардың менсіз кездескені дұрыс деп ойладым, тек соның нәтижесін көру үшін», – деді Трамп.

Оның сөзін президенттің баспасөз хатшысы Кэролайн Ливитт те растады. CNN дерегінше, ол «қазір кездесу жоспары әзірленіп жатыр, түрлі нұсқа қаралуда» деп мәлімдеген.

«Екі лидер де келіссөз үстеліне бірге отыруға дайын екенін білдірді. Сондықтан біздің ұлттық қауіпсіздік командасы осыған көмектеседі», – деді Ливитт.

18 тамызда Вашингтонда Зеленскиймен және еуропалық саясаткерлермен кездескен соң, Трамп өзінің Truth Social парақшасында Путин мен Зеленскийдің кездесуіне дайындық басталғанын жазды. Оның айтуынша, екіжақты кездесуден кейін үшжақты келіссөз өтеді. Оған Путин, Зеленский және өзі қатыспақ.

Алайда Ресей Сыртқы істер министрі Сергей Лавров «Россия-24» арнасына берген сұхбатында Путин мен Зеленскийдің тікелей келіссөздеріне қатысты жоспарды растамады. Дегенмен ол Мәскеу ешқандай форматтан бас тартпайтынын, бірақ жоғары деңгейдегі байланыстардың «аса мұқият дайындалуы тиіс» екенін атап өтті.

Болашақ саммиттің өтетін орны әзірге белгіленген жоқ. Франция президенті Эмманюэль Макрон кездесуді Женевада өткізуді ұсынды. Швейцарияның Сыртқы істер министрі Иньяцио Кассис елдің мұндай келіссөздерге алаң ұсынуға дайын екенін, тіпті Путинге Гаагадағы Халықаралық қылмыстық соттың ордері бойынша қамауға алынбауы үшін иммунитет берілетінін айтты.

Bloomberg агенттігінің хабарлауынша, Венгрия премьер-министрі Виктор Орбан Будапештті ықтимал орын ретінде атаған. Ал Италия премьері Джорджа Мелони кездесуді Римде, соның ішінде Ватиканда өткізуді ұсынды. Sky News мәліметінше, Зеленский мен Трамп Римге бейіл, ал Путин Женеваға көбірек қарайды.