Трамп пен Путин Украина мен Иран туралы сөйлесті

АҚШ президенті Дональд Трамп Ресей президенті Владимир Путинмен телефон арқылы сөйлесіп, Украинадағы соғыс пен Таяу Шығыстағы жағдайды талқылағанын Reuters мәлімдеді. Бұл туралы ол Флорида штатындағы Дорал қаласында журналистерге айтты.

Трамптың сөзінше, әңгіме «өте жақсы» өткен.

«Президент Путин мен Украина президенті Владимир Зеленскийдің арасында өте үлкен өшпенділік бар. Олар ортақ келісімге келе алмай отыр. Бірақ бұл тақырып бойынша біздің әңгімеміз оң нәтиже береді деп ойлаймын», – деді Трамп.

Сонымен қатар Трамп Путиннің Иран төңірегіндегі қақтығысты реттеуге көмектесуге дайын екенін айтқанын жеткізді.

«Путин көмектескісі келетінін айтты. Мен оған: “Егер шынымен көмектескіңіз келсе, алдымен Ресей мен Украина арасындағы соғысты тоқтату керек. Бұл әлдеқайда пайдалы болар еді”, – дедім», – деді АҚШ президенті.

Ресей президентінің сыртқы саясат жөніндегі көмекшісі де Путин Ирандағы қақтығысты «жедел саяси және дипломатиялық жолмен аяқтау» туралы ұсыныс жасағанын мәлімдеді.

Айта кетейік, Ресей мен Украина арасындағы соғыс төрт жылдан астам уақыттан бері жалғасып келеді. Соңғы уақытта Трамп бұл қақтығыстың ұзаққа созылып кеткеніне бірнеше рет алаңдаушылық білдірген.