Трамп «өзгеғаламшарлықтар» туралы құжаттарды жариялауға бұйрық берді

АҚШ президенті Дональд Трамп үкіметтік органдарға, соның ішінде Қорғаныс министрлігіне, өзгеғаламшарлықтар мен жерден тыс тіршілікке қатысты құпия құжаттарды анықтап, жариялау процесін бастауды тапсырмақ ниетін білдірді. Бұл жөнінде BBC хабарлады.

Бұл туралы Трамп Truth Social желісінде жазды. Бұған дейін ол бұрынғы президент Барак Обаманы подкасттағы сөздері үшін сынға алған еді. Обама өткен аптада подкаст жүргізушісі Брайан Тайлер Коэнге берген сұхбатында «өзгеғаламшарлықтар бар» деген пікір айтқан.

Air Force One ұшағында журналистердің сұрағына жауап берген Трамп Обаманың бұл мәлімдемесін қателік деп бағалады.

– Ол мұны айтпауы керек еді. Үлкен қателік жасады, – деді Трамп.

Журналистердің «өзіңіз өзгеғаламшарлықтардың бар екеніне сенесіз бе?» деген сұрағына Трамп:

– Шынын айтсам, олардың бар-жоғын білмеймін, – деп жауап берген.

Обама өз сұхбатында:

– Олар бар, бірақ мен оларды көрген жоқпын және олар Area 51-де жасырылып отырған жоқ. Егер қандай да бір ауқымды астыртын қастандық болмаса, оны АҚШ президентінен жасыру мүмкін емес, – деген болатын.

Алайда оның бұл сөзі кең талқылауға түскеннен кейін, Обама Instagram желісінде нақтылау жасап, ғаламның ауқымын ескере отырып, Жерден тыс тіршіліктің болуы статистикалық тұрғыдан мүмкін екенін айтқанын, бірақ президенттігі кезінде өзгеғаламшарлықтармен байланыс орнатылғанына дәлел көрмегенін мәлімдеді.

Трамп өз кезегінде көптеген адам өзгеғаламшарлықтардың бар екеніне сенетінін, бірақ өзі бұл тақырыпта пікір білдірмейтінін айтты. Дегенмен бірнеше сағаттан кейін Truth Social парақшасында «қоғам тарапынан үлкен қызығушылыққа байланысты» өзгеғаламшарлық өмір, белгісіз әуе құбылыстары (UAP), белгісіз ұшатын нысандар (UFO) және осы мәселелерге қатысты барлық ақпаратты жариялау процесін бастауға ниетті екенін жазды.

Айта кетейік, Пентагон 2024 жылғы есебінде АҚШ үкіметінің өзгеғаламшарлық тіршілікпен кездескеніне ешқандай дәлел жоқ екенін мәлімдеген. Сондай-ақ белгісіз ұшатын нысандардың көпшілігі кәдімгі объектілер болып шыққан.