Трамп Иран мұнайын иемденгісі келетінін айтты

АҚШ президенті Дональд Трамп Иранның мұнай ресурстарын өз бақылауына алғысы келетінін мәлімдеді. Financial Times басылымына берген сұхбатында Ақ үй басшысы бұл қадамды Венесуэла билеушісі Николас Мадуроны ұстау және елдің мұнай өнеркәсібін басқару әрекеттерімен салыстырған. Трамптың айтуынша, Ислам Республикасының экспортын шектеу үшін басты мұнай хабы – Харк аралын басып алу мүмкіндігі қарастырылып жатыр.

Қазіргі таңда Пентагон аталған аралды басып алу және ұстап тұру үшін аймаққа 10 мың әскери қызметші жіберуді жоспарлап отыр. 27 наурызда өңірге 3500 сарбаз, соның ішінде теңіз жаяу әскерлері келіп жетті. Трамп Иранның қорғаныс қабілетіне күмән келтіріп, аралды басып алу қиындық тудырмайтынын атап өтті. Дегенмен сарапшылар бұл операция адам шығынының артуына әкелуі мүмкін екенін ескертеді.

Таяу Шығыстағы соғыс жағдайы әлемдік нарыққа да қатты әсер етті. Мұнай бағасы айына 50%-ға өсіп, 30 наурыз күні таңертең Brent маркалы шикізаттың құны барреліне 116 доллардан асты. Бұл – қақтығыс басталғалы бергі ең жоғары көрсеткіштердің бірі. Бұған қоса, Трамп Тегеранға соғысты тоқтату туралы келісімге келу үшін 6 сәуірге дейін уақыт берді, әйтпесе АҚШ энергетикалық нысандарға соққы беретінін ескертті.

Сонымен қатар АҚШ президенті Иранның жаңа жоғарғы көшбасшысы Можтаба Хаменеидің жағдайы туралы қарама-қайшы ақпарат таратты. Трамп оның қаза тапқанын немесе ауыр халде екенін айтса, Иран билігі көшбасшының тірі әрі қауіпсіз жерде екенін алға тартты. Қазіргі уақытта Пәкістанның араағайындығымен жанама келіссөздер жүріп жатыр, бірақ Ормуз бұғазындағы мұнай тасымалының тағдыры әлі де белгісіз болып отыр.