Трамп «грин карта» лотереясын тоқтатты

АҚШ президенті Дональд Трамп «грин карта» ұтыс ойыны ретінде белгілі diversity visa бағдарламасын уақытша тоқтату туралы шешім қабылдады. Бұл бағдарлама арқылы Браун университеті мен MIT-де болған атысқа күдікті тұлғаның АҚШ-қа келгені айтылып отыр.

АҚШ Ішкі қауіпсіздік министрі Кристи Ноэм әлеуметтік желідегі X парақшасында Трамптың тапсырмасымен АҚШ Азаматтық және иммиграциялық қызметіне аталған бағдарламаны тоқтата тұру жөнінде нұсқау бергенін хабарлады.

«Мұндай адам елімізге мүлде кірмеуі тиіс еді», – деді Кристи Ноэм Португалия азаматы Клаудио Невеш Валентеге қатысты.

48 жастағы Клаудио Невеш Валенте Браун университетіндегі атыс кезінде екі студенттің қаза табуына, тоғыз адамның жаралануына, сондай-ақ MIT профессорының өліміне күдікті ретінде аталады. Ресми деректерге сәйкес, ол өзін-өзі атып, қаза тапқан.

Тергеу материалдарына сәйкес, Валенте 2000 жылы Браун университетіне студенттік визамен оқуға түскен. 2017 жылы diversity visa бағдарламасы арқылы иммиграциялық виза алып, бірнеше айдан кейін АҚШ-та тұрақты тұру мәртебесіне ие болған. Алайда оның 2001 жылы оқуын уақытша тоқтатқаннан кейін 2017 жылға дейін қайда болғаны нақты белгісіз.

Diversity visa бағдарламасы жыл сайын АҚШ-та аз ұсынылған елдердің азаматтарына 50 мыңға дейін «жасыл карта» ұтып алу мүмкіндігін береді. Бұл бағдарлама Конгресс шешімімен енгізілген және оны тоқтату заңдық дауларға ұласуы мүмкін.

Дональд Трамп diversity visa бағдарламасына бұрыннан қарсы. Сарапшылар бұл шешімді АҚШ-тағы трагедияны иммиграциялық саясатты қатаңдату үшін пайдалану деп бағалап отыр. Бұған дейін де Трамп әкімшілігі иммиграцияны шектеу бағытында бірқатар қадам жасаған. Жақында АҚШ Жоғарғы соты Трамптың туу арқылы азаматтық беру құқығына қатысты бастамасын қарауға келіскен.