Трамп Эпштейн ісін дұрыс басқармаған АҚШ-тың бас прокурорын қызметінен босатты

АҚШ Президенті Дональд Трамп елдің бас прокуроры Пэм Бондиді қызметінен босатты. Бұл шешімге президенттің Бондидің жұмысына, әсіресе секс-қылмыскер Джеффри Эпштейнге қатысты файлдардың жариялануына көңілі толмауы себеп болғанын өзінің Truth Social парақшасында жариялады.

Дереккөздердің хабарлауынша, Трамп сонымен қатар Бондидің өз қарсыластарына қарсы қылмыстық істерді қозғауда тым баяу қимылдағанына наразылық білдірген. Әзірге Әділет министрлігін уақытша бас прокурордың орынбасары Тодд Бланш басқаратын болады. Президент әлеуметтік желідегі жазбасында Бондиді "ұлы американдық патриот" деп атап, оның қылмыспен күрестегі еңбегін жоғары бағалады және жуырда оның жеке секторға ауысатынын мәлімдеді.

Пэм Бондидің қызметтегі кезеңі Эпштейнге қатысты тергеу құжаттарының айналасындағы даулармен есте қалды. Ол Эпштейннің секс-траффик істеріне қатысты жазбаларды жасырды немесе дұрыс басқармады деп айыпталған болатын. Бұл сын Трамптың одақтастары мен кейбір республикашыл заң шығарушылар тарапынан да айтылды.

Пэм Бонди өз кезегінде Трамптың әкімшілігінде жұмыс істеу ол үшін үлкен мәртебе болғанын айтып, алдағы бір ай ішінде өкілеттігін Бланшқа өткізіп беретінін жеткізді. Тодд Бланш бұған дейін Трамптың жеке адвокаты болған, енді ол Әділет министрлігінің тізгінін қолға алады.

Ақ үй өкілдерінің мәлімдеуінше, Трамп соңғы бірнеше ай бойы Бондидің жұмысына көңілі толмайтынын бірнеше рет ескерткен. Қазіргі уақытта бас прокурор лауазымына негізгі кандидаттардың бірі ретінде Қоршаған ортаны қорғау агенттігінің басшысы Ли Зелдин қарастырылып жатыр.