Трамп билігі артық салмағы бар шетелдіктерге виза беруді шектеуді ұсынды

АҚШ Мемлекеттік департаменті артық салмағы бар шетел азаматтарына иммиграциялық виза бермеуді ұсынған жаңа нұсқаулық жариялады. Бұл туралы Daily Mail басылымы хабарлады.

Құжат Дональд Трамп әкімшілігі қолға алып отырған иммиграциялық шектеулер пакетінің бір бөлігі ретінде ұсынылған. Нұсқаулықта семіздік бірнеше медициналық дертпен қатар аталады. Ол аурулар ел бюджетіне қосымша шығын әкелуі мүмкін деп көрсетілген.

Құжатқа сәйкес, АҚШ билігі қымбат медициналық көмекті талап етуі мүмкін аурулар қатарында жүрек-қан тамыр аурулары, тыныс алу жүйесі аурулары, онкологиялық дерттер, диабет, метаболикалық бұзылулар, неврологиялық аурулар және психикалық денсаулыққа қатысты мәселелерді атап өткен. Бұл тізімге семіздік те кіреді.

Трамп әкімшілігінің өкілі Томми Пиготт нұсқаулықтың бар екенін растады.

«Бұнда ешқандай құпия жоқ. Трамп әкімшілігі америкалықтардың мүддесін бірінші орынға қояды. Оған иммиграциялық жүйенің ел бюджетінен артық шығын шығармауын қамтамасыз ету де кіреді», – деді ол.

Нұсқаулыққа сәйкес, иммиграциялық визаға өтініш берушілерден енді өз денсаулығына байланысты мүмкін шығындарды АҚШ-тың мемлекеттік көмегіне жүгінбей-ақ өз қаржысымен өтей алатынын дәлелдеуі талап етіледі.