«Тозақта өмір сүретін боласыңдар»: Трамп Иранға соңғы ескертуін жасады

АҚШ Президенті Дональд Трамп Ормуз бұғазына қатысты Иран билігіне қатаң ультиматум қойды. Ақ үй басшысы егер стратегиялық су жолы 7 сәуір кешке дейін ашылмаса, Тегеранның «тозақ отына» оранатынын ескертті. Reuters агенттігінің хабарлауынша, бұл мәлімдеме Таяу Шығыстағы шиеленістің шарықтау шегіне жеткенін көрсетеді.

Трамп өзінің Truth Social әлеуметтік желісінде: «Сол бір бұғазды ашыңдар, әйтпесе тозақта өмір сүретін боласыңдар!» - деп жазды.

 Reuters басылымының мәліметінше, бұған дейін 6 сәуірге белгіленген дедлайн тағы 20 сағатқа ұзартылып, сейсенбінің кешіне ауыстырылған.

Осы мәлімдемеден кейін көп ұзамай Тегеранның оңтүстігінде жойқын жарылыстар болды. Иранның мемлекеттік БАҚ-тары тұрғын үйге жасалған соққыдан кем дегенде 13 адамның қаза тапқанын хабарлап отыр.

Иран тарапы да қарап қалмай, Парсы шығанағындағы елдердің энергетикалық нысандарына соққы беруді жиілетті. Кувейт, Бахрейн және БАӘ-дегі мұнай-химия зауыттары шабуылға ұшырап, «Kuwait Petroleum» компаниясы үлкен материалдық шығын келгенін мәлімдеді. Сонымен қатар Дубайдағы Жебель-Али портында Израильмен байланысы бар кемеге соққы жасалған.

Шиеленістің салдарынан әлемдік нарықта мұнай бағасы күрт өсіп, Brent маркалы мұнайдың баррелі 110 доллардан асып кетті.

Трамп өзінің қатаң мәлімдемесіне қарамастан, Fox News эфирінде Иранмен делдалдар арқылы келіссөздер жүріп жатқанын айтты. Оның сөзінше, тараптар 6 сәуір күні-ақ ортақ мәмілеге келуі мүмкін. Қазіргі уақытта делдалдар соғысты толық тоқтатуға көшу үшін 45 күндік уақытша бітімгершілік орнату мәселесін талқылауда.

Сондай-ақ, Трамп АҚШ арнайы жасағының Иран аумағында жүргізген қауіпті операциясы туралы айтып берді. Онда америкалық сарбаздар атып түсірілген F-15 ұшағының штурманын құтқарып, құпия технологиялар жау қолына түспеуі үшін техниканы сол жерде жойып жіберген.

Еске сала кетейік, АҚШ пен Израильдің Иранға қарсы соғысы 28 ақпанда басталып, бес аптадан астам уақытқа созылды. Reuters мәліметінше, бұл қақтығыс Иран мен Ливанда мыңдаған адамның өмірін қиды.