TikTok енді Қытайдан бөлінеді: Америкалықтар үшін не өзгереді?

TikTok әлеуметтік желісі АҚШ-тағы жұмысын жалғастыру үшін маңызды келісімге қол қойды. Енді бұл қосымшаның Америкадағы бөлігі Қытайдағы басты кеңседен бөлініп, жеке компания ретінде жұмыс істейтін болады. Негізгі мақсат - америкалық пайдаланушылардың жеке мәліметтерін Қытай билігінің бақылауынан толық қорғау, деп хабарлайды BBC.

Жаңа ереже бойынша, TikTok-тың видео ұсыну жүйесі немесе алгоритмі тек Америка ішіндегі деректер негізінде қайта жасақталады. Бұл америкалық қолданушылар үшін қосымшаның жұмысы мен ондағы видеолардың көрсетілу тәртібі біршама өзгеруі мүмкін дегенді білдіреді.

Естеріңізге сала кетейік, егер Қытайдың ByteDance компаниясы өз бизнесін америкалық инвесторларға бермесе, TikTok 2025 жылдың қаңтарында АҚШ-та мүлдем бұғатталуы тиіс еді. 

Алайда Президент Дональд Трамп бұл шешімді бірнеше рет кейінге шегеріп, соңында осындай ымыраға келуге мүмкіндік берді. Бұл қадам АҚШ заң шығарушыларының «азаматтардың деректері Қытайға өтіп кетеді» деген басты қорқынышын сейілту үшін жасалып отыр.