TikTok активтерін америкалық инвесторларға сату жөнінде келісім жасады

TikTok-тың қытайлық иесі — ByteDance компаниясы АҚШ-тың үш ірі инвесторымен өз активтерін сату туралы міндеттемелік келісімдерге қол қойды. Бұл туралы Reuters агенттігі TikTok бас директоры Шоу Цзы Чьюге сілтеме жасап хабарлады.

Келісімнің негізгі шарттары қыркүйек айында жарияланған мәміле нұсқасына сәйкес келеді. Ол кезде АҚШ президенті Дональд Трамп қытайлық иесі активтерін сатпаған жағдайда қосымшаны ел аумағында тыйым салуды көздейтін заңның күшіне ену мерзімін 20 қаңтарға дейін кейінге қалдырған болатын.

Осылайша, ByteDance пен TikTok үш басқарушы инвестормен — Oracle, Silver Lake және MGX компанияларымен міндеттемелік келісімдерге қол қойды. Құжатқа сәйкес, Oracle, жеке инвестициялық Silver Lake компаниясы және Абу-Дабиде орналасқан MGX компаниясы TikTok акцияларының 45 пайызын бірлесіп иеленеді (әрқайсысына 15 пайыздан тиесілі).  Акциялардың 30,1 пайызы ByteDance-тің қазіргі инвесторларына тиесілі болса, компанияның өз үлесі 19,9 пайыз көлемінде сақталады.

Сондай-ақ АҚШ аумағында TikTok USDS Joint Venture LLC деп аталатын жаңа бірлескен кәсіпорын құрылатыны хабарланды.

Бұл мәміле ұлттық қауіпсіздікке қатысты алаңдаушылықтарға байланысты ByteDance-ті АҚШ-тағы бизнесін сатуға мәжбүрлеуге бағытталған көпжылдық талпыныстарға нүкте қойды.

Қазіргі таңда TikTok-ты АҚШ-та 170 миллионнан астам адам тұрақты түрде пайдаланады.

Айта кетейік, қыркүйек айында АҚШ президенті Дональд Трамп қытайлық TikTok компаниясының қызметін америкалық және халықаралық инвесторларға сату туралы жарлыққа қол қойған еді. Сол кезде Трамп TikTok «толығымен америкалықтардың бақылауында болады» деп мәлімдеген.