Telegraph: Украина соғысты тоқтату үшін аумағының бір бөлігін беруі мүмкін

The Daily Telegraph басылымының мәліметінше, Украина Еуропа қолдайтын бейбіт жоспар аясында соғысты тоқтатып, Ресей бақылауында тұрған кейбір аумақты беруге келісуі ықтимал.

Басылым жазғандай, Украина президенті Владимир Зеленский еуропалық лидерлерге Киевтің қосымша аумақтардан бас тартатын кез келген келісімге қарсы екенін айтқан. Дегенмен Ресейдің қазіргі қол астында ұстап отырған аймақтарының бір бөлігін сақтап қалуына жол берілуі мүмкін. Бұл жағдайда майдан шебі қазіргі күйінде қалып, Мәскеу Донецк, Луганск, Запорожье және Херсон облыстарының оккупацияланған аумақтарын, сондай-ақ аннексияланған Қырымды бақылауда ұстайды.

Мәліметтерге қарағанда, келіссөз позициясының жұмсаруы 15 тамызда Аляскада өтетін АҚШ пен Ресей президенттері Дональд Трамп пен Владимир Путиннің кездесуінің алдында орын алған.

Украина тарапынан бұл ақпаратқа қатысты пікір білдірілген жоқ. 11 тамыз кешінде Владимир Зеленский Ресейдің соғысты тоқтатуға дайын екеніне ешқандай белгі жоқ екенін айтты. Оның сөзінше, керісінше, Ресей әскері жаңа шабуылдарға дайындалып жатыр. Зеленский мұны украин барлау қызметінің деректерімен негіздеді.

Бұған дейін Зеленский Украина өз жерін "сыйға тартпайтынын" мәлімдеген. The Wall Street Journal-дың хабарлауынша, Киев пен Еуропаның соғысты тоқтату бойынша өз жоспары бар: кез келген бейбіт келісім тек атысты толық тоқтатқаннан кейін қарастырылуы тиіс. Егер аумақтық келісімге барылса, Украина нақты қауіпсіздік кепілдіктерін, соның ішінде НАТО-ға мүше болу мүмкіндігін алуы керек.

АҚШ президенті Дональд Трамп та соңғы күндері соғысты аяқтау үшін аумақтық алмасу мүмкіндігін жоққа шығармады.