Тәжікстанда бақсы-балгерлерге барғандарға айыппұл салу ұсынылды

Тәжікстан үкіметі балгерлерге, құмалақшыларға, сиқыршылар мен түрлі «сәуегейлерге» жүгінген азаматтарды айыппұлмен жазалауды көздеп отыр. Бұл туралы ASIA-Plus хабарлады.

Жаңа түзетуге сәйкес, Әкімшілік құқық бұзушылық туралы кодекстің 482-бабына «сиқыршы, балгер, көріпкел қызметін пайдалану» тармағы енгізілмек. Айыппұл көлемі 5-тен 10 есептік көрсеткішке дейін белгіленеді – 375-тен 750 сомониге дейін (шамамен 21 926 – 43 853 теңге).

Елде балгерлікпен күрес өткен жылдан бастап күшейтілген. Тәжікстан ІІМ балгерлерге барғандарды ішкі істер органдарына шақырып, арнайы базаға тіркейтінін мәлімдеген. Ведомство мұны «балгерлердің клиенттерін азайту және олардың ісін тоқтату» үшін жасалған қадам деп түсіндірген.

2024 жылы балгерлік пен сиқыршылықпен айналысатындарға жазаны күшейту туралы заң қабылданған болатын. Айыппұл көлемі 80–100 есептік көрсеткішке (6000–7500 сомони, яғни 350 820 – 438 525 теңге) дейін арттырылып, 15 тәулікке дейін әкімшілік қамау шарасы енгізілді. Кейін Қылмыстық кодекске де түзету енгізіліп, әкімшілік жазаға тартылғаннан кейін қайтадан балгерлікпен айналысқандарға 2000 есептік көрсеткішке дейін (150 мың сомони немесе 8,77 млн теңге) айыппұл салу немесе 2 жылға дейін бас бостандығынан айыру жазасы қарастырылды.

ІІМ мәліметінше, 2025 жылдың алғашқы алты айында елде 495 балгерлік пен сиқыршылық фактісі тіркелген.