Таяу шығыстағы соғысқа Хезболла да қосылды

Таяу Шығыстағы қақтығыс жаңа деңгейге көтеріліп, Израиль армиясы Ливанның астанасы Бейрут пен елдің оңтүстік өңірлерін атқылай бастады. Бұл шиеленіске Тегеран қолдайтын «Хезболла» тобының 2024 жылғы қарашадағы атысты тоқтату келісімін бұзып, Израильге алғаш рет ірі шабуыл жасауы себеп болды. Содырлар мұны Иранның жоғарғы көсемі Әли Хаменеидің қазасына кек қайтару деп мәлімдеді.

Израиль әскерилері Бейрут пен елдің оңтүстігіндегі «Хезболла» нысандарына «дәлдігі жоғары» соққылар бергенін растады. Сонымен қатар Израиль тарапы Ливанның оңтүстігі мен шығысындағы 50-ге жуық елді мекен тұрғындарына үйлерін дереу тастап шығуды бұйырды. Бұл шешім Ливанның оңтүстігінде жаппай эвакуацияға әкеліп, жолдарда үлкен көлік кептелісі пайда болды.

Ливан билігі бұл жағдайға алаңдаушылық білдіруде. Премьер-министр Наваф Салам «Хезболланың» әрекетін «жауапсыздық» деп атап, бұл қадамның елді үлкен қауіпке итермелегенін айыптады. Өз кезегінде, Израиль тарапы эскалация үшін жауапкершілікті толықтай содырларға жүктеді. Еске сала кетейік, аймақтағы жағдай АҚШ пен Израильдің Иранға жасаған ауқымды әскери операциясынан кейін күрт ушығып кеткен болатын.