Рим Папасы Палестина мемлекетін құруға шақырды

Рим Папасы Лев XIV Таяу Шығыстағы ұзақ жылдарға созылған палестина-израиль қақтығысын шешудің жалғыз жолы – Палестина мемлекетінің құрылуы мен халықаралық деңгейде танылуы екенін мәлімдеді.

Бұл туралы понтифик 30 қараша күні Түркиядан Ливанға ұшып бара жатқан сапары кезінде айтты, деп хабарлайды Reuters.

«Бәрімізге белгілі, қазіргі таңда Израиль бұл шешімді қабылдаудан бас тартып отыр. Бірақ біз оны жалғыз дұрыс жол деп санаймыз. Біз Израильмен де достық қарым-қатынастамыз және екі тараптың әділ келісімге келуіне делдал болуға дайынбыз», – деді Лев XIV түрік журналисінің сұрағына жауап бере отырып.

Бұл сапар – мамыр айында сайланғаннан кейін Лев XIV-тің алғашқы шетелдік ресми сапары. Ол 27 қарашада Түркияға келген, ал Ливанда 2 желтоқсанға дейін болмақ.

Айта кетсек, Ватикан Палестина мемлекетін 2015 жылы ресми түрде мойындаған. Бұл шешім Рим Папасы Франциск понтификатында қабылданған еді. Дегенмен Ватиканның баспасөз қызметі Палестина іс жүзінде 2013 жылы, БҰҰ бақылаушы мәртебесін алған кезде-ақ мойындалғанын атап өткен.

Ол кезде Израильдің Сыртқы істер министрлігі Ватиканның бұл шешімі Таяу Шығыстағы бейбіт реттеу процесіне көмектеспейтінін мәлімдеген болатын.

Израиль тарапы бүгінге дейін Палестина мемлекетінің құрылуына қарсы. Биыл қараша айының ортасында Израиль премьер-министрі Биньямин Нетаньяху кезекті рет палестиналық мемлекетті құруға қарсы екенін айтты. Бұған дейін де ол БҰҰ Бас Ассамблеясында сөйлеген сөзінде Франция, Ұлыбритания, Аустралия және Канада билігінің Палестинаны мойындау туралы шешімін «масқара әрекет» деп бағалаған.