Reuters: Путин Украинамен шектелмей, Еуропада жаңа соғыстарға ұмтылады

Reuters агенттігі АҚШ барлау қауымдастығының қорытындыларымен таныс алты дереккөзге сілтеме жасап, Ресей президенті Владимир Путиннің мақсаты тек Украинамен шектелмей, бұрын Кеңес одағы құрамында болған Еуропаның өзге аймақтарына да ықпалын кеңейту екенін жазды.

Агенттік дерегінше, барлау қызметтерінің соңғы талдауы биылғы қыркүйекте жасалған. Алайда Путиннің жаулап алу ниетіне қатысты негізгі тұжырым Ресейдің Украинаға қарсы кең ауқымды басқыншылығы басталғалы бері өзгермеген. Бұл қорытынды Ресей басшысының жұма күні өткен «тікелей желідегі» мәлімдемелеріне, сондай-ақ АҚШ президенті Дональд Трамп әкімшілігіндегі кейбір өкілдердің ашық айтқан пікірлеріне қайшы келеді.

Дереккөздердің айтуынша, еуропалық көшбасшылар мен барлау қызметтері де Путиннің Еуропада соғыс қимылдарын кеңейтуге дайын екенін жоққа шығармайды. Бұл пікірді АҚШ Конгресінің Өкілдер палатасындағы барлау комитетінің мүшесі, демократ конгрессмен Майк Куигли де растаған.

Ол Reuters агенттігіне берген пікірінде барлау мәліметтері әрдайым Путиннің «тағы да көп нәрсеге ұмтылатынын» көрсетіп келгенін айтты.

«Еуропалықтар бұған сенімді. Польша бұған толықтай көз жеткізген. Ал Балтық елдері өздерін Украинадан кейінгі алғашқы нысана деп санайды», – деді Куигли.

Reuters жазуынша, аталған бағалаулар Ресей мен Батыс елдері арасындағы шиеленіс күшейіп тұрған тұста жарияланып отыр және Еуропадағы қауіпсіздікке қатысты алаңдаушылықты одан әрі арттыра түскен.