Ресей Қорғаныс министрлігі соғысқа қанша ақша жұмсалғанын алғаш рет жариялады

Ресей Қорғаныс министрлігі Украинадағы соғысқа тікелей байланысты шығындардың көлемін алғаш рет ашық айтты. Ведомство мәліметінше, 2025 жылы «арнайы әскери операцияға тікелей қатысты» мемлекеттік бюджет шығыстары елдің жалпы ішкі өнімінің 5,1 пайызын құрайды. Бұл жөнінде Faridaily хабарлады.

Бұл деректер Қорғаныс министрі Андрей Белоусовтың министрлік алқасының отырысында ұсынған презентациясында келтірілген. Ресей Экономикалық даму министрлігінің болжамына сәйкес, 2025 жылы елдің ЖІӨ көлемі 217,3 трлн рубль болады. Осыған сүйенсек, Ресейдің Украинадағы соғысқа жұмсайтын шығынын шамамен 11,1 трлн рубль деп бағалауға болады.

Айта кетейік, Қорғаныс министрлігі бұған дейін «арнайы әскери операцияға тікелей байланысты» шығындарды жеке көрсеткен емес. Осы уақытқа дейін тек федералдық бюджеттің «Ұлттық қорғаныс» бабы бойынша жалпы шығыстар ғана белгілі болатын. Бұл бапқа тек соғыс шығындары емес, болашаққа арналған қару-жарақ әзірлеу, әскери инфрақұрылыс салу секілді шығындар да енгізіледі.

Ресей Қаржы министрлігінің соңғы деректеріне сәйкес, 2025 жылы «Ұлттық қорғаныс» бабы бойынша федералдық бюджет шығыстары 13,5 трлн рубльді құрайды. Осылайша, бұл соманың шамамен 82 пайызы Украинадағы соғысқа тікелей жұмсалмақ.

Андрей Белоусовтың айтуынша, 2025 жылы Қорғаныс министрлігінің жұмысы федералдық бюджетке байланысты қатаң қаржылық шектеулер жағдайында жүргізіліп жатыр. Министрлікке бөлінген жалпы бюджет көлемі ЖІӨ-нің 7,3 пайызына тең, яғни 15,9 трлн рубль. Ал соғыс қимылдарына қатысы жоқ шығындардың үлесі 2025 жылы 2,7 пайыздан 2,2 пайызға дейін қысқартылған.

Бұған дейін Ресей билігі Қорғаныс министрлігінің толық бюджетін, оның ішінде жабық бөлігін, құпиялылық себептеріне байланысты жарияламаған еді.