Путин Тәжікстан президентіне мектептегі қанды оқиғаға байланысты көңіл айтты

Ресей президенті Владимир Путин Тәжікстан басшысы Эмомали Рахмонға Мәскеу маңындағы мектепте қаза тапқан тәжікстандық балаға байланысты көңіл айтты. Бұл туралы «Интерфакс» агенттігі хабарлады.

Путин қаза болған төртінші сынып оқушысының өліміне кінәлілер міндетті түрде жазаланатынын мәлімдеген.

– Балаларға қарсы жасалған мұндай қылмыс – аса жиренішті әрекет. Тергеу ісі соңына дейін жеткізіліп, кінәлілер толық көлемде жауапқа тартылады, – деген Ресей президенті.

Қайғылы оқиға 16 желтоқсанда Мәскеу облысындағы Горки-2 елді мекеніндегі мектепте болған. Тәжікстан азаматы, 9 жастағы Кобилджон Алиевке 9-сыныпта оқитын 15 жастағы жасөспірім пышақ салған. Бала алған жарақаттарынан көз жұмды. Күдікті ұсталып, тергеу изоляторына қамалды.

Ресейлік БАҚ-тың мәліметінше, шабуыл жасаған жасөспірім әрекетін видеоға түсіріп, жеке Telegram арнасына жариялаған. Кадрларда ол пышақ ұстап, балаларға жақындап, олардың ұлтын сұрағаны көрінеді.

Оқиғадан кейін Тәжікстанның Сыртқы істер министрлігі Ресейдің елшісін шақырып, ресми нота тапсырған. Құжатта тергеуді жан-жақты жүргізіп, кінәлілерді қатаң жазалау талап етілген.