OpenAI медициналық деректерді талдайтын ChatGPT Health қызметін іске қосты

OpenAI компаниясы АҚШ-та пайдаланушылардың медициналық жазбаларын талдап, денсаулыққа қатысты нақтырақ кеңес беретін ChatGPT Health атты жаңа функцияны таныстырды. Дегенмен құқық қорғаушылар бұл қадам жеке деректердің құпиялылығына қауіп төндіруі мүмкін екенін ескертуде, деп хабарлайды BBC. 

Енді пайдаланушылар өздерінің медициналық құжаттарын Apple Health, Peloton және MyFitnessPal сияқты танымал қолданбалардағы деректерін жасанды интеллектімен бөлісе алады. Бұл жүйе жиналған ақпаратты талдап, әр адамның жеке жағдайына сәйкес келетін дербес кеңестер береді. Статистикаға сүйенсек, қазірдің өзінде апта сайын 230 миллионнан астам адам чат-ботқа денсаулық пен салауатты өмір салтына қатысты сұрақтар қояды.

Бұл жаңалық қоғамда үлкен пікірталас тудырды. АҚШ-тағы Демократия және технология орталығының сарапшысы Эндрю Кроуфорд былай дейді:

«Жаңа AI құралдары пациенттерге мүмкіндік береді, бірақ денсаулық туралы мәліметтер - адамның ең маңызды ақпараты. OpenAI жарнамалық бизнес үлгісіне көшіп жатқанда, бұл деректердің басқа чаттардан бөлек, мызғымас қауіпсіздікте сақталуы өте маңызды».

Бұл қызмет деректерді қорғаудың қатаң заңдарына байланысты әзірге Еуропалық Одақ пен Ұлыбританияда іске қосылған жоқ.