Норвегиялық дипломат Эпштейнмен байланысы болғандықтан отставкаға кетті

Норвегияның Иордания мен Ирактағы елшісі Мона Юуль америкалық қаржыгер Джеффри Эпштейнмен байланысы туралы мәліметтер жарияланғаннан кейін қызметінен кетті. Бұл туралы Норвегия Сыртқы істер министрлігі ресми мәлімдеме жасады.

АҚШ Әділет министрлігі жариялаған құжаттарда 66 жастағы дипломаттың балаларына Эпштейннің мұрасынан қомақты қаржы қалдырылғаны көрсетілген. Осы деректерден кейін елші Мона Юуль ведомство басшылығымен келіссөз жүргізіп, өз еркімен отставкаға кету туралы шешім қабылдады.

Норвегия СІМ басшысы Эспен Барт Эйде бұл қадамды «дұрыс және қажетті» деп бағалады. Оның айтуынша, Эпштейнмен орнатылған байланыстар дипломаттың «түйсігі мен шешім қабылдау қабілетіндегі күрделі қателіктерді» көрсетеді. Бұл жағдай дипломатиялық міндеттерді атқару үшін өте маңызды саналатын сенімге нұқсан келтірген.

Тергеу мәліметтеріне сәйкес, Джеффри Эпштейн 2019 жылғы тамызда түрмеде өз-өзіне қол жұмсар алдында жазған өсиетінде Мона Юульдің екі баласы - Эмма мен Эдвардты атап өткен. Құжат бойынша, олардың әрқайсысына 5 миллион АҚШ доллары мөлшерінде мұра қалдырылған.

Сондай-ақ, бұл іске Юульдің күйеуі, белгілі саясаткер әрі дипломат Терье Руд-Ларсеннің де қатысы бар. Ол бұған дейін өзі басқарған Халықаралық бейбітшілік институтының  Эпштейн қорларынан 650 мың еуро көлемінде қайырымдылық көмек алғаны үшін қызметінен кеткен болатын.

Қазіргі уақытта Норвегияның Сыртқы істер министрлігі келесі бағыттар бойынша тексеру жүргізуде:

• Мона Юульдің ведомстводағы қызметі кезінде Эпштейнмен байланысының деңгейі;
• Министрлік тарапынан Халықаралық бейбітшілік институтына  бөлінген бюджет қаражатының мақсатты жұмсалуы.

Мона Юуль қаржыгермен тек жұмыс бабымен танысқанын және байланысының шектеулі болғанын айтып ақталуда. Алайда, норвегиялық БАҚ оның күйеуі мен Эпштейн арасында «жеке қаржылық қарым-қатынастар» болғанын алға тартады. Дипломат тергеу амалдарына толық атсалысуға уәде берді.