Николас Мадуро Нью-Йорктегі түрмеге жеткізілді

АҚШ-тың бірқатар бұқаралық ақпарат құралы Венесуэла басшысы Николас Мадуро америкалық әскери операция барысында ұсталып, Нью-Йорк қаласындағы қамау изоляторына жеткізілгені туралы хабар таратты.

Мәліметтерге сәйкес, қолына кісен салынған Мадуроны федералды агенттер алдымен АҚШ-тың Есірткімен күрес басқармасының Нью-Йорктегі кеңсесіне апарып, құжаттық рәсімдерден өткізген. Кейін ол Бруклиндегі уақытша ұстау орталығына жеткізілгені айтылады.

Fox News әлеуметтік желілерде жариялаған бейнежазбада 63 жастағы Мадуро журналистерге: «Қайырлы кеш, Жаңа жыл құтты болсын», – деп қысқаша пікір білдіргені көрсетіледі.

Сонымен қатар бірқатар дереккөздер Мадуро алдымен Кубадағы Гуантанамо әскери базасына жеткізіліп, кейін Нью-Йорк штатындағы Ұлттық гвардия базасына ауыстырылғанын мәлімдеді. Алайда бұл ақпарат ресми түрде расталмаған.

3 қаңтар күні өткен баспасөз мәслихатында АҚШ президенті Дональд Трамп Венесуэлада жүргізілген әскери операция жөнінде мәлімдеме жасап, Вашингтон уақытша бұл елдегі басқаруды өз бақылауына алуы мүмкін екенін айтқан. Оның сөзінше, бұл «қауіпсіз әрі реттелген өтпелі кезеңді қамтамасыз ету» мақсатында жасалмақ.

АҚШ әрекетін Иран, Ресей және Каракастың бірқатар одақтастары айыптаған. Ал шетелде тұратын венесуэлалық оппозиция өкілдері бұл ақпаратты қолдаған мәлімдемелер жасаған.