Неміс тілі үстем, бірақ… Германия үйлерінде тағы қандай тілдер естіледі?

Халықаралық ана тілі күні қарсаңында Германияның Федералдық статистикалық басқармасы ел тұрғындарының күнделікті өмірде қолданатын тілдеріне қатысты зерттеу нәтижелерін ұсынды. 2024 жылғы микросанақ мәліметтеріне сәйкес, неміс тілі негізгі қарым-қатынас құралы болып қала бермек, деп хабарлайды Dw.com.

Статистикалық есеп бойынша, Германия тұрғындарының басым бөлігі - 77 пайызы - үй жағдайында тек неміс тілінде ғана сөйлейді.

Зерттеу барысында елдегі тілдік ортаның барған сайын әртүрлі болып жатқаны анықталды.

Тұрғындардың 17 пайызы үйде неміс тілімен қатар, кем дегенде тағы бір қосымша тілде сөйлеседі. Айта кетерлігі, осы топтағы әрбір төртінші адам (26 пайызы) үшін неміс тілі бәрібір басым тіл болып саналады. Германиядағы үй шаруашылықтарының 6 пайызында тек қана шет тілдері қолданылады, олар күнделікті тұрмыста неміс тілін мүлдем пайдаланбайды.

Германиядағы 15,5 миллион тұрғын үйде ішінара немесе толықтай шет тілдерінде сөйлесуді жөн көреді. Олардың ішінде ең танымалдары:

• Түрік тілі - 14 пайыз;
• Орыс тілі - 12 пайыз;
• Араб тілі - 9 пайыз.

Миграциялық тегі бар азаматтардың тілдік таңдауы:

Бүгінде Германияда миграциялық өткені бар 21,4 миллион адам тұрады. Статистика көрсеткендей, бұл санаттағы азаматтар да неміс тілін белсенді қолданады:

• 22 пайызы үйде тек неміс тілінде сөйлейді;
• 55 пайызы неміс тілін басқа тілмен қатар қолданады;
• 23 пайызы үйде неміс тілін мүлдем пайдаланбайды.

Сарапшылардың пікірінше, бұл деректер Германияның көпұлтты және көптілді мемлекет ретіндегі бейнесін айқын көрсетеді, сонымен қатар неміс тілінің интеграциялық рөлін растайды.