Не көздегені бар? Мексика президенті Кореядан BTS концертін көбірек өткізуді сұрады

Әлемге танымал K-pop тобы BTS-тің концерттеріне деген сұраныстың тым жоғары болуына байланысты Мексика Президенті Клаудия Шейнбаум Оңтүстік Корея Президенті Ли Чжэ Мёнге ресми өтініш жолдады. Шейнбаум өз әріптесінен Мексикадағы концерттер санын арттыруға көмектесуді сұраған, деп хабарлайды Reuters.

«Барлығының барғысы келеді», — деді Шейнбаум дүйсенбі күнгі таңғы баспасөз мәслихатында. Ол Оңтүстік Корея басшысына қосымша концерттер ұйымдастыру туралы дипломатиялық хат жібергенін атап өтті. «1 миллионға жуық жасөспірім билет сатып алғысы келеді, бірақ бар болғаны 150 000 билет сатылымға шыққан», — деді Президент.

Билет тапшылығы нарықтағы бағаның шарықтауына әкелді. Тұтынушылардың құқығын қорғау агенттігі Ticketmaster компаниясына тексеру жүргізіп, StubHub және Viagogo сияқты қайта сату платформаларына санкция салмақ.

Билет бағасындағы айырмашылық жер мен көктей: егер Ticketmaster-де ең арзан билет 1 800 песо (шамамен 52 322 тг) болса, алыпсатарлар оны 11 300 песодан (328 471 тг+) бастап сатып жатыр. Ал VIP орындардың ресми бағасы 17 800 песо (518 000 тг) болғанымен, қайта сату платформаларында оның құны 92 100 песоға (2 678 000 тг астам) дейін жеткен.

Бұл жағдайдан кейін Мексика билігі ауқымды іс-шаралар кезінде билет сатуды қатаң реттейтін жаңа ережелер әзірлеуге көшті. Президенттің бұл қадамы халықаралық деңгейдегі мәдениет пен саясаттың астасқан сирек оқиғасының бірі болып отыр.