Мыңдаған Қазақстан азаматы неміс әскеріне қосылуы мүмкін

Немістің Die Welt газеті хабарлауынша, Германияда жаңа тәртіп бойынша әскерге шақырылатын мыңдаған неміс азаматының қос азаматтығы бар. Олардың арасында Ресей мен Қазақстан азаматтығына ие жастар да бар.

Федералдық статистика ведомствосының дерегінше, 2022 жылдың мамыр айында елде 2008 жылы туған 340 859 ер бала тіркелген. Олардың 56 693-і Германия азаматтығымен қатар өзге елдердің паспортын да иеленген. Атап айтқанда:

– 3 691-і – Ресей азаматтары,

– 1 620-сы – Қазақстан азаматтары,

– 14 463 – Түркия,

– 4 141 – Польша,

– 3 857 – Италия,

– 1 888 – Сербия,

– 1 640 – Марокко азаматтары.

Жаңа заң жобасына сәйкес, 2026 жылдан бастап барлық 18 жастағы азаматтар арнайы анкета толтырып, медициналық тексерістен өтеді. Егер еріктілер саны жеткіліксіз болса, әскерге шақыру лотерея түрінде жүргізілуі мүмкін.

Анкета толтыру кезінде өзге ел азаматтығы туралы мәліметті көрсету міндетті болады. Германия Қорғаныс министрлігі бұл талаптың сенімсіздік таныту емес, тек азаматтардың Германия алдындағы міндетін нақтылау үшін қажет екенін атап өтті.

Алайда Die Welt жазғандай, Ресеймен қос азаматтығы бар жастарға қатысты қауіп күшейген. Украинадағы соғыс жағдайында олардың адалдығына және құпия ақпаратқа қолжетімділігіне байланысты күмән туындауы мүмкін. Сондықтан барлық еріктілерге конституцияға адалдық тексерісі жүргізіледі.

Неміс заңгері Фердинанд Вебердің пікірінше, қос азаматтығы бар кейбір жастарды әскерге қабылдамау ықтималдығы жоғары.

Сонымен бірге Германияның Сыртқы істер министрлігі Германия мен Ресей азаматтығына ие адамдарға Ресейге бармауға кеңес беріп отыр, себебі оларды Ресей армиясына шақырып алуы мүмкін.

Еске сала кетейік, тамыз айында Германия үкіметі «Әскери қызметті жаңғырту туралы заң жобасын» мақұлдаған болатын. Құжаттың мақсаты – бундесвердің (Германия қарулы күштері) санын 180 мыңнан 260 мыңға дейін арттыру.

Билік бұл шешімді Ресейдің Украинадағы соғысы және Еуропаға төнген қауіппен түсіндіреді.