Мұнай бағасы $100-ға жетті: әлем елдері төтенше қорларын ашуға мәжбүр

«Үлкен жетілік» елдерінің көшбасшылары әлемдік мұнай нарығындағы жағдайды талдауды Халықаралық энергетикалық агенттікке (МЭА) тапсырды. Нәтижесінде агенттікке мүше мемлекеттер нарықты тұрақтандыру мақсатында өздерінің төтенше стратегиялық қорларынан 400 млн баррель мұнай бөлу туралы шешім қабылдады.

Бұл шешім Ормуз бұғазының жабылуы және мұнай бағасының күрт өсуі аясында қабылданып отыр. Қазіргі уақытта Brent маркалы мұнайдың бағасы барреліне 100 долларға дейін жеткен.

Әзірге МЭА-ға мүше елдер мұнайды нарыққа қандай механизм арқылы және қашан шығаратыны нақты жарияланған жоқ.

Reuters агенттігінің мәліметінше, 400 млн баррель мұнай — әлем бойынша шамамен төрт күнде тұтынылатын көлемге тең. Сондай-ақ бұл көлем Ормуз бұғазы арқылы 20 күнде өтетін мұнай мөлшеріне сәйкес келеді. Алайда сарапшылар төтенше қорларды жиі пайдалану мүмкін еместігін атап өтеді.

Айта кетейік, Халықаралық энергетикалық агенттік - Экономикалық ынтымақтастық және даму ұйымы (OECD) аясында жұмыс істейтін автономды халықаралық құрылым. Оған 30-дан астам мемлекет мүше. Қазақстан бұл ұйымға кірмейді. Агенттік 1973–1974 жылдардағы мұнай дағдарысынан кейін энергетикалық қауіпсіздікті қамтамасыз ету мақсатында құрылған.