Молдова парламенті ТМД-дан шығуды мақұлдады

Молдова парламенті елдің Тәуелсіз Мемлекеттер Достастығынан (ТМД) шығуына негіз болатын келісімдерді денонсациялау туралы заңдарды екінші, соңғы оқылымда қабылдады.

Парламент ТМД-ны құру туралы 1991 жылғы келісімді, оған қатысты хаттаманы және 1993 жылы қабылданған ұйым жарғысын денонсациялау туралы шешім қабылдады. Бұл шешімге парламенттің 101 депутатының 60-ы қолдау білдірді.

Заң жобаларын билік партиясы мен бірқатар депутат қолдаса, коммунистер мен социалистер партиясының депутаттары қарсы дауыс берген. Қарсы тарап бұл шешімді ел экономикасы үшін теріс салдары болуы мүмкін деп бағалады.

Молдова ТМД-дан шығу процесін 2026 жылдың қаңтарында бастаған. Үкімет наурыз айында келісімдерді денонсациялау туралы шешімді мақұлдаған, ал парламент наурыздың соңында бірінші оқылымда қабылдаған.

Енді Молдова билігі бұл туралы ТМД Атқару комитетін ресми түрде хабардар етеді. Осыдан кейін 12 ай өткен соң елдің ұйымға мүшелігі толық тоқтатылады.

Сонымен қатар Молдова билігі ел азаматтарына немесе экономикаға тиімді кейбір келісім Еуропалық бағытқа қайшы келмесе, оларды сақтап қалуы мүмкін екенін мәлімдеді.