Лукашенко АҚШ өкілінен арықтататын укол сұраған

АҚШ президентінің Беларусь бойынша арнайы өкілі Джон Коул Минскіде Александр Лукашенкомен өткен келіссөздер барысында болған жайттар туралы айтып берді. The Wall Street Journal басылымының жазуынша, Беларусь басшысы санкциялармен қатар президенттік ұшақ және артық салмақтан арылу мәселесін көтерген.

Басылымдағы сұхбатта Коул 2025 жылдың басында Беларуське арнайы өкіл болып тағайындалғанда бұл елдің нақты қай жерде орналасқанын да білмегенін мойындаған. Ол алғаш рет сәуір айының соңында Минскіге келіп, АҚШ азаматы Юрий Зенковичті түрмеден алып шыққан. Сол сапар барысында Лукашенко президент сарайында қонақасы ұйымдастырған. WSJ дерегінше, кешкі аста арақ көп болған.

Коул келіссөз кезінде әдейі дөрекі стильді таңдағанын, Лукашенко да соған жауап ретінде орыс тілінде қатқыл сөйлей бастағанын айтады. Арнайы өкіл халықаралық саясатты «мектеп асханасымен» салыстырып, Лукашенкоға Беларусь қазір «сәтсіздер үстелінде» Венесуэла, Иран және Солтүстік Кореямен бірге отырғанын, ал АҚШ қолдаса «беделділер қатарына» қосыла алатынын айтқан.

Маусым айындағы тағы бір кездесуде Беларусь билігі 14 саяси тұтқынды босатқан. Сол жолы Лукашенко Коулдан қалай арықтағанын сұраған. Арнайы өкіл АҚШ-та қолданылатын Zepbound атты арықтауға арналған инъекциялық препаратты пайдаланғанын айтып, дәрі туралы буклетті Беларусь басшысына табыстаған.

The Wall Street Journal мәліметінше, АҚШ шенеуніктері Лукашенкоға бұл препаратты жеткізу мүмкіндігін де қарастырған. Алайда нақты жеткізілген-жеткізілмегені белгісіз. Басылым дереккөздері Лукашенко артық салмақ мәселесін сәуір айында да көтергенін жазады.

Коулдың келіссөздерінің нәтижесінде 2025 жылдың ішінде барлығы 190-ға жуық беларусьтік саяси тұтқын бостандыққа шыққан. Желтоқсан айында АҚШ Беларусь калий өнімдеріне салынған санкцияларды алып тастағанын жариялады.