Лавров Украина дрондары Путин резиденциясын нысанаға алды деп мәлімдеді

Ресейдің сыртқы істер министрі Сергей Лавров украиналық ұшқышсыз ұшу аппараттары Ресей президенті Владимир Путиннің Новгород облысындағы резиденциясына шабуыл жасады деп айтты. Оның сөзінше, 29 желтоқсанға қараған түні әуе қорғанысы Украина Қарулы күштеріне тиесілі 91 дронды жойған. Бұл жөнінде BBC-дің орыс қызметі хабарлады.

Алайда Ресей Қорғаныс министрлігі президент резиденциясына дрондар шабуылы болғаны туралы ресми хабар таратпады. Қирау немесе зардап шеккендер жөнінде де мәлімет жоқ.

Лавровтың айтуынша, аталған жағдайдан кейін Мәскеу келіссөздердегі ұстанымын қайта қарамақ, бірақ диалогтан бас тартпайды. Сонымен бірге Ресей жауап соққысын жоспарлап отыр, оның нысандары мен уақыты алдын ала айқындалған.

Украина президенті Владимир Зеленский бұл мәлімдемені жалған деп бағалады. Оның пікірінше, Ресей Киевке соққы жасауға сылтау іздеп отыр.

Зеленский Ресей Украина мен АҚШ арасындағы соңғы байланыстарға алаңдайтынын, Мәскеудің жаңа шабуылдарды ақтау үшін себеп іздеп отырғанын айтты.

АҚШ президенті Дональд Трамп та мәселеге қатысты пікір білдіріп, Владимир Путинмен телефон арқылы сөйлескенін жеткізді. Трамптың айтуынша, Ресей президенті өз резиденциясына жасалған болжамды шабуыл туралы хабарлаған. Ол бұл жағдайды «жақсы емес» деп бағалады.

Сонымен бірге Трамп шабуыл туралы ақпараттың шындыққа сай болмауы да мүмкін екенін атап өтті. Оның сөзінше, бұл мәліметті Путиннің өзінен естіген, алайда оқиғаның егжей-тегжейін білмейді.

Қазіргі таңда тараптардың мәлімдемелері өзара сәйкес келмейді, ал тәуелсіз дереккөздер резиденцияға шабуыл жасалғанын растаған жоқ.