Қырғызстан Ресейді сотқа берді

Қырғызстан Еуразиялық экономикалық одақтың (ЕАЭО) сотына Ресейге қарсы талап-арыз берді. Бұл туралы Kloop.kg басылымы хабарлады.

Мәліметке сәйкес, Қырғызстан тарапы Ресейдің еңбек мигранттарына қатысты ЕАЭО аясында жасалған келісім талаптарын орындамай отырғанын алға тартқан. Бұл мәселе Жогорку Кеңештің еңбек және әлеуметтік мәселелер жөніндегі комитетінің отырысында көтерілді. Отырыста Міндетті медициналық сақтандыру қоры төрағасы Азамат Муканов Ресей тарапы келісімде көрсетілген нормаларды бұзып отырғанын мәлімдеді.

Оның айтуынша, міндетті медициналық сақтандыру (ММС) полисі Ресейде жұмыс істейтін еңбек мигранттарының отбасы мүшелеріне де берілуі тиіс.

«Бұл келісімге бес мемлекет қол қойған. Алайда қазіргі таңда Ресей тарапы аталған құжаттың 96–97-баптарын бұзып, еңбек мигранттарының отбасы мүшелеріне ММС полисін беруден бас тартып отыр», – деді Азамат Муканов.

Сөз болып отырған құжат – 2014 жылы қабылданған Еуразиялық экономикалық одақ туралы шарт. Оның «Еңбек миграциясы» бөліміне сәйкес, 96-бапта мүше мемлекеттердің келісілген көші-қон саясатын жүргізуі және адам құқықтары мен бостандықтарын сақтау қағидаттарын ұстануы көзделген. Ал 97 және 98-баптарда еңбек мигранты мен оның отбасы мүшелері жұмыс істеп жатқан елдің азаматтарымен тең дәрежеде әлеуметтік сақтандыру мен жедел медициналық көмек алу құқығына ие екені көрсетілген.

Өткен жылдың қараша айында Ресей Мемлекеттік думасының төрағасы Вячеслав Володин шетел азаматтарына медициналық полис беру тәртібі өзгергенін хабарлаған еді. Оның айтуынша, енді Ресейде заңды түрде кемінде бес жыл жұмыс істеген шетелдіктер ғана тегін медициналық көмек ала алады.

ЕАЭО сотының бұл іс бойынша шешімі шамамен екі апта ішінде шығарылады деп күтіліп отыр.