Қырғызстан президенті Қамшыбек Ташиевті не үшін босатқанын айтты

Қырғызстан президенті Садыр Жапаров алғаш рет Ұлттық қауіпсіздік жөніндегі мемлекеттік комитеттің бұрынғы төрағасы Қамшыбек Ташиевті қызметінен босату себебін жария етті. Бұл туралы ол Kabar.kg басылымына берген сұхбатында айтты.

Президенттің сөзінше, шешім қоғам мен билік арасындағы жікшілдікке жол бермеу мақсатында қабылданған. Ол бұл мәселе қоғамда қызу талқыланғаннан кейін жағдайды өзі түсіндіруді жөн санағанын жеткізді.

Жапаровтың айтуынша, Жогорку кеңеште жекелеген депутаттық топтар «кімнің жағындасың?» деген сауал қойып, тараптарға бөліне бастаған. Оның пайымдауынша, бір тарап «генералды» қолдап, «президент жағын» қарсы күш ретінде көрсеткен.

– Егер мен мұндай шешуші қадамды дер кезінде жасамағанда, бұл жағдай қарапайым азаматтарға да әсер етіп, халық екіге бөлінуі мүмкін еді. Менде кейбір депутаттар мен мемлекеттік қызметкерлерді «генерал» жағына шығуға мәжбүрлеу туралы дәлелдер болды. Оларға «біздің жаққа өтпесеңіз, генералмен күресуге тура келеді» деп айтылған. Сондықтан осындай шешім қабылдауға мәжбүр болдым, – деді Садыр Жапаров.

Президенттің айтуынша, жарлыққа қол қояр алдында ол Ташиевпен телефон арқылы сөйлесіп, жағдайды түсіндірген.

Мерзімінен бұрын президент сайлауын өткізуге шақырған 75 адамның хатына бұл шешімнің қатысы бар-жоғы туралы сұраққа Жапаров тікелей байланыс бар деп айта алмайтынын жеткізді. Оның пікірінше, Ташиев белгілі бір топтардың ықпалына түскен болуы немесе депутаттар арасындағы жікшілдікке жол бергенін түсініп, жауапкершілік сезінген болуы мүмкін.

Еске салайық, 10 ақпанда Садыр Жапаров Қамшыбек Ташиевті министрлер кабинеті төрағасының орынбасары әрі Ұлттық қауіпсіздік жөніндегі мемлекеттік комитеттің төрағасы қызметінен босатқан. Ташиевке жақын журналист Нұрғазы Анарқұлов әлеуметтік желіде саясаткердің мәлімдемесін жариялаған. Онда Ташиев президент шешімі өзі үшін күтпеген болғанын, бірақ оны орындайтынын айтқан.