Колумбияда 114 әскери қызметкері бар ұшақ апатқа ұшырады

Колумбияның Путумайо провинциясында бортында 114 сарбазы бар «C-130 Hercules» әскери-көлік ұшағы құлап, елді дүр сілкіндірді. BluRadio таратқан мәліметке сүйенсек, әуе кемесі Каукая әуежайынан көкке көтерілгеннен кейін небәрі бір минут өткенде апатқа ұшыраған.

Оқиға куәгерлері жойқын жарылыс дауысын естіп, артынша аспанға көтерілген қою түтін мен лаулаған өртті көргендерін айтуда. Ұшақ Пуэрто-Легуисамо қаласының орталығынан небәрі үш шақырым жерге құлаған.

Қазіргі уақытта оқиға орнында жедел құтқару жұмыстары жүріп жатыр. Алдын ала деректер бойынша, 67 адам аман қалып, шұғыл түрде ауруханаларға жеткізілген. Кейбір сарбаздардың жағдайы өте ауыр деп бағалануда. Колумбия Қорғаныс министрі Педро Санчес әскери бөлімшелердің апат орнында жұмыс істеп жатқанын, алайда құрбандар саны мен апаттың нақты себебі әлі белгісіз екенін мәлімдеді.

Жергілікті билік өкілдері әуежайдың ұшу-қону жолағының қысқалығы бұл қайғылы жағдайға себеп болуы мүмкін деген күдік келтіруде. Айта кетейік, бұл соңғы күндердегі жалғыз әуе апаты емес: 22 наурызда Нью-Йорктегі Ла-Гуардия әуежайында да ұшақ пен өрт сөндіру көлігі соқтығысып, адам шығыны тіркелген болатын.