Ким Чен Ын жаңа атомдық сүңгуір қайықты көрсетті

Солтүстік Корея атомдық қозғалтқышы бар, зымырандармен жабдықталған жаңа сүңгуір қайық салып жатқанын көрсетті. Бұл туралы елдің орталық телеграф агенттігі хабарлады.

Жарияланған суреттерде салынып жатқан сүңгуір қайықты КХДР басшысы Ким Чен Ынның өзі барып көргені көрсетілген. Жаңа кеменің салмағы шамамен 8 700 тонна болады. Ким Чен Ын бұл жобаны елдің қорғаныс қабілетін күшейтетін маңызды қадам деп атады.

Оның айтуынша, соңғы жылдары салынған әскери кемелер мен сүңгуір қайықтар елдің теңіз күштерін нығайта түскен. Солтүстік Корея алдағы уақытта да жаңа су үсті және су астындағы әскери кемелерді көбірек салып, оларды әртүрлі шабуыл қаруларымен жабдықтауды жоспарлап отыр. Сонымен қатар Ким Чен Ын су астында қолданылатын жаңа құпия қаруларға қатысты зерттеулермен де танысқан.

КХДР басшысы Оңтүстік Кореяның атомдық сүңгуір қайықтар салу жоспарын аймақтағы тұрақтылыққа қауіп төндіреді деп бағалады. Оның пікірінше, бұл Солтүстік Кореяның ұлттық қауіпсіздігіне және теңіздегі егемендігіне қатер төндіреді.

Осыған байланысты Пхеньян өз ядролық күштерін одан әрі күшейтетінін мәлімдеді. Ким Чен Ын қарсы тарап әскери әрекетке барса, оған қатаң жауап берілетінін ескертті.

Айта кетейік, Солтүстік Корея атомдық сүңгуір қайық салып жатқанын алғаш рет осы жылдың наурыз айында хабарлаған. Қазіргі таңда елдің әскери-теңіз күштерінде 70–90 шамасында дизельді сүңгуір қайық бар. Алайда олардың көпшілігі ескі және зымыран емес, тек торпедо мен миналарды қолдануға ғана жарамды.