Канада мектебіндегі жаппай атыс: 10 адам қаза тауып, 25 тұрғын жараланды

Канаданың Британдық Колумбия провинциясындағы Тамблер-Ридж орта мектебінде болған жаппай атыс салдарынан, күдіктіні қосқанда, кемінде 10 адам қаза тапты. Провинция премьері Дэвид Эби бұл оқиғаны «ақылға сыйымсыз қасірет» деп сипаттады, деп хабарлайды aljazeera.

Канаданың Корольдік атты полициясының (RCMP) мәлімдемесіне сәйкес, сейсенбі күні алты адам мектеп ішінде жан тәсілім еткен, тағы бір адам ауруханаға бара жатқан жолда қайтыс болған. Сондай-ақ, полиция мектептегі атыспен байланысы бар деп есептейтін жақын маңдағы үйлердің бірінен тағы екі адамның мәйіті табылды.

Күдіктінің өзі де оқиға орнында өлі күйінде табылды. Алдын ала болжам бойынша, ол өзіне-өзі қол жұмсаған.

Зардап шеккендер ішінде  9 құрбан және 1 шабуылдаушы  бар. 2 адам ауыр халде тікұшақпен ауруханаға жеткізілді, тағы 25 адам жеңіл жарақаттармен жергілікті медициналық орталықта тексерілуде.

Мектептегі барлық оқушылар мен қызметкерлер эвакуацияланды. RCMP солтүстік округінің қолбасшысы Кен Флойд тергеушілер күдіктінің әйел адам екенін анықтағанын хабарлады. Қоғамдық ескертуде шабуылдаушының қоңыр шашты, көйлек киген әйел болғаны айтылған. Қазіргі уақытта оның аты-жөні мен қылмысқа не итермелегені белгісіз.

12-сынып оқушысы Дариан Куисттің айтуынша, атыс кезінде оқушылар есіктерді үстелдермен бекітіп, екі сағаттан астам уақыт бойы тығылып отырған. Тамблер-Ридж - небәрі 3000-ға жуық тұрғыны бар шағын қалашық, сондықтан қала мэрі Даррил Краковка құрбандардың көбін жеке танитынын айтып, қайғыдан қан жылайтынын жеткізді.

Канадада қару ұстау заңдары АҚШ-қа қарағанда қатаң болғанымен, соңғы жылдары мұндай қайғылы оқиғалар жиілеп кетті. 2022 жылы бұрынғы Премьер-министр Джастин Трюдо тапаншаларды сатып алу мен сатуға «мұздату» (freeze) шарасын енгізген болатын. Айта кетейік, Канада тарихындағы ең жойқын мектептегі атыс 1989 жылы Монреальда болған (14 студент қыз қаза тапқан еді).