Израиль не үшін генералдарын қызметінен босатқаны мәлім болды

Reuters-тің хабарлауынша, Израиль қорғаныс күштерінің (IDF) бас штабы 2023 жылғы 7 қазандағы ХАМАС шабуылы кезінде жіберілген қателіктер үшін бірнеше жоғары лауазымды әскери қызметкерді жұмыстан босатып, кейбірін тәртіптік жазаға тартты.

Израиль әскери басшысы Эял Замирдің мәлімдеуінше, бірқатар генерал қордағы қызметтен босатылды, олардың қатарында барлау, операциялар және Газа секторына жауапты оңтүстік қолбасшылықтың бұрынғы басшылары бар. Бұлар бұған дейін белсенді қызметтен кеткенімен, резервтік құрамда болған.

«7 қазанда IDF өз миссиясын орындай алмады. Израиль азаматтарын қорғау міндеті орындалмады. Бұл – шешім қабылдаудағы және әрекет ету барысындағы жүйелі әрі ауыр қателік. Сол күннің сабағы болашақтағы бағыт-бағдарымызды айқындауы тиіс», – деді Эял Замир.

Әскерилердің айтуынша, бір офицер қызметінен толықтай босатылған, тағы бірі өз еркімен отставкаға кеткен.

Бұл шешім қоғамдық қысымның күшеюі аясында қабылданып отыр. Израильде мыңдаған адам үкіметтен 7 қазан оқиғасына қатысты ұлттық тергеу комиссиясын құруды талап етіп, Тель-Авивте наразылық шеруіне шыққан.

Еске сала кетсек, ХАМАС пен өзге палестиналық топтардың 7 қазандағы шабуылы кезінде Израильде шамамен 1 200 адам қаза тауып, 250-ге жуық адам тұтқынға алынған.

Бұл оқиға Израильдің Газаға қарсы әскери операциясының басталуына себеп болды.

Газа денсаулық сақтау органдарының дерегінше, соғыстың салдарынан 69 мыңнан астам адам қаза тапқан.

Өткен айда АҚШ-тың арағайындығымен Израиль мен ХАМАС соғысты тоқтату жөнінде уақытша келісімге келген болатын.