Израиль мен АҚШ арасындағы қатынас нашарлауы мүмкін

Израиль премьер-министрі Биньямин Нетаньяху жүргізіп отырған саясат Иран төңірегіндегі жағдай аясында Израиль мен АҚШ арасындағы қатынасты нашарлатуы мүмкін. Бұл туралы РИА Новости агенттігіне түркиялық саяси сарапшы, «Анкара–Мәскеу» талдау желісінің жетекші сарапшысы Энгин Өзер айтты.

Сарапшының пікірінше, Нетаньяху ұстанып отырған агрессивті және арандатушы саясат Израильдің дәстүрлі сыртқы саясатына қайшы келеді. Оның айтуынша, соңғы оқиғалардан кейін аймақтағы бірқатар ел, әсіресе Сауд Арабиясы Израильмен қатынасты қалыпқа келтіру үдерісінен алыстай бастаған.

Өзердің бағалауынша, Иранға қарсы операция Парсы шығанағы елдерінде елеулі алаңдаушылық туғызған. Ол Израильдің Иран мен араб елдері арасындағы текетіресті күшейту стратегиясы аймақтағы мемлекеттердің қауіпсіздігіне қатер төндіруі мүмкін деп санайды.

Сарапшының айтуынша, бұл жағдай Израильдің өңір елдерімен экономикалық және саяси байланыстарына да кері әсер етуі ықтимал.

Өзердің пікірінше, Израиль басшылығының әрекеттері АҚШ әкімшілігінің жағдайын да күрделендірген. Оның сөзінше, соңғы оқиғалардан кейін Америка мен Еуропа қоғамында Израильді сынау күшейіп, антиизраильдік көңіл күй арта түскен.

Сарапшы қазіргі Тель-Авив саясаты Израиль мен АҚШ арасындағы қатынастың нашарлауына әсер ететін факторлардың бірі болуы мүмкін екенін айтты. Оның бағалауынша, соңғы оқиғалар Израильге деген сенімнің мұсылман әлемінде ғана емес, Еуропа мен АҚШ-та да әлсіреуіне алып келген.