Израиль Иранның барлау басшысының көзі жойылғанын мәлімдеді

Израиль Иранның барлау министрі Эсмаил Хатибтің қаза тапқанын мәлімдеді. Бұл туралы Израильдің қорғаныс министрі Исраэль Кац хабарлады.

Оның айтуынша, 18 наурызға қараған түні жасалған соққы нәтижесінде жоғары лауазымды ирандық шенеунік көз жұмған. Алайда Иран билігі әзірге бұл ақпаратты ресми түрде растаған жоқ.

Бұл мәлімдеме Иранның Қауіпсіздік кеңесінің басшысы Әли Лариджанидің қаза тапқаны туралы ақпараттан кейін бір күн өткен соң жарияланды. Иран тарапы Лариджанидің өлімін растады.

Израиль қорғаныс министрі алдағы уақытта қақтығыс одан әрі күшеюі мүмкін екенін айтып, «барлық бағытта күтпеген жағдайлар болады» деп мәлімдеді. Сондай-ақ ол премьер-министр Биньямин Нетаньяхумен бірге Израиль армиясына жоғары лауазымды ирандық тұлғаларды жоюға келісімсіз әрекет етуге рұқсат берілгенін айтты.

Осы уақытта Иранда Лариджани мен «Басидж» жасақтарының басшысы Голамреза Сулейманиді жерлеу рәсімдері өтіп жатыр. Қоштасуға мыңдаған адам жиналған.

Ал Израиль аумағында Иран тарапынан жасалған зымыран шабуылдары салдарынан екі адам қаза тапты. Шабуыл Тель-Авив пен елдің орталық өңірлеріне бағытталған. Қаза болғандар – бомбадан қорғану орнына жетіп үлгермеген егде жастағы ерлі-зайыпты.

Соңғы мәліметтер бойынша, қақтығыс басталғалы Израильдегі құрбандар саны 14 адамға жеткен. Израиль дереккөздері Иран шабуыл кезінде кассеталық оқ-дәрілер қолданғанын мәлімдеді.