Израиль Хаменеидің оң қолы саналып келген Әли Лариджанидің қаза тапқанын хабарлады

Израиль Қорғаныс министрі Исраэль Кац Иранның Жоғарғы ұлттық қауіпсіздік кеңесінің хатшысы Әли Лариджани Израиль әскерінің әуе соққысы нәтижесінде қаза тапқанын мәлімдеді. Бұл туралы BBC-дің орыс қызметі хабарлады.

Исраэль Кацтың айтуынша, Лариджани өткен түнде жүзеге асырылған операция кезінде «Басидж» жасағының қолбасшысы Ғоламреза Солейманимен бірге жойылған. Израиль әскери өкілдері бұл ақпаратты растап, Лариджанидің соққының негізгі нысаны болғанын жеткізді. Қазіргі уақытта Иран тарапынан бұл ақпаратқа қатысты ресми растау түскен жоқ, алайда жергілікті Tasnim және Mehr агенттіктері жақын арада маңызды хабарлама жарияланатынын хабарлады.

Әли Лариджани – Иранның саяси иерархиясындағы ең ықпалды тұлғалардың бірі. Ол ақпан айында АҚШ пен Израиль соққысынан қаза тапқан Иранның рухани көсемі Әли Хаменеидің сенімді өкілі әрі «оң қолы» саналған. Хаменеи өлгеннен кейін Лариджани елдегі стратегиялық шешімдерді қабылдайтын басты фигуралардың біріне айналды. Оның өлімі расталса, бұл Иранның қазіргі басқару жүйесі үшін орны толмас соққы болмақ.

Анықтама ретінде айта кетсек, Әли Лариджани ұзақ жылдар бойы Иран парламентінің спикері және ядролық бағдарлама бойынша бас келіссөзші қызметтерін атқарған. Ол 2026 жылдың 28 ақпанында басталған АҚШ-Израиль және Иран арасындағы қарулы қақтығыс кезінде елдің қауіпсіздік стратегиясын үйлестіруші болды. Соңғы апталарда Израиль Иранның жоғары лауазымды тұлғаларын нысанаға алу операцияларын күшейтіп отыр.