Испания АҚШ-қа өз әскери базаларын пайдалануға рұқсат бермеді

Испания билігі Иранға соққы беру үшін өз аумағындағы әскери базаларды АҚШ иелігіне беруден ресми түрде бас тартты. Сонымен қатар Мадрид ел аумағынан Америка Әскери-әуе күштерінің жанармай тасушы танкерлерін шығарып жіберді, деп хабарлайды El Pais басылымы.

Испания үкіметі АҚШ пен Израильдің Иранға қарсы бағытталған әскери іс-қимылдарын қолдамайтынын нақты білдірді. Ресми Мадрид Тегеранның Парсы шығанағы елдері мен Кипрге жасаған шабуылдарына жауап ретінде «шамалас шабуылдаушы әрекеттерге» дайын екендігін мәлімдеген Франция, Германия және Ұлыбританияның ұстанымынан алшақтады.

Испания Сыртқы істер министрі Хосе Мануэль Альбарес Еуропаның саясаты салмақты болуы тиіс екенін атап өтті:

«Еуропаның ұстанымы жағдайды ушықтыруға емес, керісінше деэскалацияға және келіссөздер үстеліне қайта оралуға бағытталуы тиіс», - деді министр.

Бұған дейін АҚШ президенті Дональд Трамптың аймақтағы әскери операцияларды тиімді жүргізу үшін шетелдік базаларды, соның ішінде Еуропадағы нысандарды пайдалану мүмкіндігін қарастырып жатқаны хабарланған болатын. Испанияның бұл шешімі Вашингтонның логистикалық жоспарларына айтарлықтай әсер етуі мүмкін.

Қазіргі уақытта Испания Еуропа Одағы ішінде қақтығысты әскери жолмен емес, дипломатиялық әдістермен шешуді жақтайтын негізгі елдердің біріне айналып отыр.